काठमाडौं । सत्तारूढ दल नेकपा (माओवादी केन्द्र)का सांसद वर्षमान पुनले मिडिया र सामाजिक सञ्जालमा आएकै भरमा सत्ता वा प्रतिपक्षी दलको नेता गलत नहुने बताएका छन् ।

मंगलबारको प्रतिनिधिसभा बैठकको विशेष समयमा बोल्दै उनले मिडिया तथा सामाजिक सञ्जालले आरोप लगाउँदैमा कोही दोषी नहुने र उनीहरूको पछि राज्यसंयन्त्र जबजरस्ती लाग्न नपर्ने धारणा राखे । उनले तथ्य र प्रमाण पुग्छ भने जो कोहीलाई छाड्न नहुनेमा पनि जोड दिए ।

“सरकारको संयन्त्र दक्ष र स्वतन्त्र छन् विश्वासमा छन् भन्ने बुझ्नु पर्छ । सदनले आवश्यक कार्यदल बनाउने अन्यथा र प्रतिष्ठाको विषय बनाउनुहुँदैन,” उनले भने ।

माओवादी केन्द्रको उपमहासचिव समेत रहेका पुनले अहिले एक शक्तिशाली आयोग बनाइ नेपालको राष्ट्रिय सांस्कृतिक नीति कस्तो हुने भनेर कार्य अघि बढाउनुपर्ने धारणा राखे । साथै उनले धरानदेखि देशका विभिन्न क्षेत्रमा साम्प्रदायिक सद्भाव राख्नुपर्ने चुनौती अहिले देखा परेको जानकारी दिए ।

“विभिन्न आन्दोलनहरूले राजनीतिक परिवर्तनले नयाँ उपलब्धि हासिल गरेका छौँ । देश धर्म निरपेक्ष गणतन्त्र देशको रूपमा काम गरिरहेका छौँ । अतिवादहरू देखा परेका छन् । कुनै पनि यस्ता अतिवादलाई प्रशंय दिनु हुँदैन,” उनले भने ।

उनले प्रत्येक समुदायको सांस्कृतिक स्वायत्तालाई सम्मान गर्नुपर्ने भन्दै विभेदरहित समाज बनाउने दिशामा अघि बढ्नुपर्ने जिकीर गरे ।

साथै उनले शान्ति प्रकृयाको बाँकी रहेको काम पुरा गर्न सदनमा रहेको टीआरसी विधेयक पास गर्नुपर्नेमा जोड दिए ।