काठमाडौं । नेकपा (एमाले)का महासचिव शंकर पोखरेलले कोसी प्रदेशमा सत्ता गठबन्धनले लोकतन्त्र र संविधानको हुर्मत लिएको बताएका छन् । मुख्यमन्त्री उद्धव थापाले विवादास्पदरूपमा आज विश्वासको मत लिएपछि एमाले महासचिव पोखरेले गठबन्धनले पटकपटक संविधानको हुर्मत लिइरहेको टिप्पणी गरेका हुन् ।

सोमबार राति फेसबुकमा उनले लेखेका छन्, "संविधान रक्षाको दाबी गर्ने गठबन्धनले लोकतन्त्र र संविधानको हुर्मत लिएको देख्दा भन्नै पर्ने भो– अब त अति भयो ।"

उनले नेपालको संविधानले सभामुखको भूमिका तटस्थ र निष्पक्ष हुने मान्यता राखेको तर कोसीमा गठबन्धनले सरकार गठनका लागि सभामुख हुँदै सभाध्यक्षलाई पनि असंवैधानिक रूपमा प्रयोग गरेको टिप्पणी गरेका छन् ।

"यसरी पटकपटक संविधानको हुर्मत लिने सत्ता गठबन्धनले संविधान रक्षाको दाबी गर्नु ‘सौ चुहे खाकर बिल्ली चली हजको’ भने जस्तै हो । त्यसैले सबैले एकस्वरमा भनौं, ‘इनफ इज इनफ," उनको भनाइ छ ।