विराटनगर । कोसी प्रदेशसभाकी उपसभामुख सिर्जना दनुवार आफैँले बोलाएको प्रदेशसभा बैठक छलेर काठमाडौं हिँडेपछिको परिस्थितिबारे प्रदेशसभा सचिवालयले कानुन व्यवसायीसँग परामर्श थालेको छ ।

उपसभामुख दनुवारले बिरामी भएको भन्दै अनुपस्थित हुने सूचना दिएपछि प्रदेशसभाको बैठक कसरी सञ्चालन गर्ने भन्नेबारे सचिवालयले मुख्य न्यायाधिवक्तासहित कानुन व्यवसायीसँग छलफल गरेको हो ।

सचिवालयले कोसी प्रदेशका मुख्य न्यायाधिवक्ता बुद्धिबहादुर कटुवाल, पूर्वमुख्य न्यायाधिवक्ता चूडामणि आचार्यसहितका कानुन व्यवसायीसँग छलफल गरेको हो ।

उपसभामुख दनुवार अनुपस्थित भएपछि आज बिहान ८ बजेका लागि बोलाइएको कार्यव्यवस्था परामर्श समितिको बैठक स्थगित भएको थियो । बैठकमा सहभागी सदस्यहरूको सल्लाहअनुसार कानुन व्यवसायीसँग छलफल भइरहेको कोसी प्रदेशसभाका सचिव गोपालप्रसाद पराजुलीले जानकारी दिए ।

उपसभामख दनुवारले आफू अनुपस्थित हुँदा अध्यक्षमण्डलका सदस्य इसराइल मन्सुरीलाई बैठक सञ्चालनको जिम्मेवारी दिएको बारे संवैधानिक र कानुनी विषयमा सचिवालय छलफलमा जुटेको हो ।

मुख्यमन्त्री उद्धव थापाले विश्वासको मत लिने कार्यसूची रहेकै दिन उपसभामुखको अनुपस्थिति र उनले बैठक सञ्चालनको जिम्मेवारी मन्सुरीलाई तोकेको विषयमा छलफल भइरहेको बताइएको छ ।

अध्यक्षमण्डलमा रहेका नेकपा (एमाले)का सांसद मालतीकुमारी लिम्बू र राप्रपाका अमरबहादुर विष्टले प्रदेशसभा बैठकमा अनुपस्थित रहने सूचना आइतबार नै दिएका थिए ।