काठमाडौं । नेपाली कांग्रेसले आफ्नो पार्टीका सांसद डा. सुनील शर्माले गएको साउन २९ गते संसद् बैठकमा प्रयोग गरेको शब्द असंसदीय नभएको भन्दै रेकर्डबाट हटाउनु नपर्ने जनाएको छ ।

संसद्को गतिरोध हटाउन आइतबार सभामुख देवराज घिमिरेले पार्टीका प्रमुख सचेतक र सचेतकहरूलाई छलफलका लागि बोलाएका थिए । सो छलफलपछि कांग्रेसका सचेतक सुशीला थिङले डा. शर्माले असंसदीय शब्द प्रयोग नगरेकाले रेकर्डबाट हटाउनु नपर्ने पक्षमा आफूहरू रहेको बताइन् ।

नेकपा (एमाले)का सांसदले पनि डा. शर्माको अभिव्यक्ति असंसदीय नभएकाले हटाउनु नपर्ने बताएको उनले जानकारी गराइन् ।

सांसद शर्माले ‘सरकारले आतंककारीहरूको नेतृत्व गर्दै हुनुहुन्छ कि डेमोक्रेटिक सरकारको नेतृत्व गर्दैै हुनुहुन्छ ?’ भन्ने प्रश्न गरेको र यो शब्द संसदीय रहेको उनले जिकिर गरिन् ।

“हामी सबैले सदन अवरुद्ध भइरहेको छ, डा. सुनील शर्माले बोलेको विषय रेकर्डबाट हटाउनुपर्ने हो कि होइन, त्यो लिगल हो कि होइन भन्ने कुरामा छलफल गरेको छौँ । प्रमुख प्रतिपक्ष दलको प्रमुख सचेतकले अब सरकारले उच्चस्तरीय संयन्त्र गठन नगरेसम्म अघि बढ्न सक्दैनौँ भन्नुभयो, लामो समयसम्म त सदन अवरुद्ध गर्नु हुँदैन, सुनील शर्माजीको रेकर्ड पनि हटाउनुपर्छ जस्तो लाग्दैन भन्नुभयो,” उनले भनिन्, “समिति सभापतिहरूको चयन चाँडो गर्नुपर्ने, सकेसम्म चाँडो निकास निकाल्न प्रयास गरिरहेको भन्नुभयो । संसद्लाई यसरी बन्धक बनाइरहनु हुँदैन भन्नुभयो । शर्माले यो सरकारले आतंककारीहरूको नेतृत्व गर्दै हुनुहुन्छ कि डेमोक्रेटिक सरकारको नेतृत्व गर्दैै हुनुहुन्छ भन्ने प्रश्न रहेछ । त्यसैले त्यो कुरा संसदीय मर्यादाभित्र रहेर बोल्नुभएको जस्तो लाग्यो । नेपाली कांग्रेसको सचेतक भएकाले हटाउनुपर्छ भन्ने पक्षमा छैन । माओवादीले आज कुनै कुरा राखेन ।”

बैठकमा सभामुख घिमिरेले संसद्को गतिरोध अन्त्य गर्न दलहरू मिल्नुपर्ने र समिति सभापति चाँडो चयन गर्नुपर्ने धारणा राखेको उनले बताइन् ।