काठमाडौं । सर्लाहीमा पेस्तोल र गोलीसहित दुईजना पक्राउ परेका छन् । सशस्त्र प्रहरीको टोलीले शनिबार राति उनीहरूलाई नियन्त्रणमा लिएको हो ।

पक्राउ पर्नेमा सर्लाहीकै हरिपुर्वा नगरपालिका–६ का प्रकाश यादव र जीवन राय यादव रहेका छन् । उनीहरूलाई पर्सा गाउँपालिका–६ स्थित सीमा क्षेत्रबाट नियन्त्रणमा लिइएको सशस्त्र प्रहरीले जनाएको छ ।

उनीहरू भारतबाट नेपालतर्फ आउँदै गरेको बीआर १९ जीए ४१४१ नम्बरको मोटरसाइकलमा सवार थिए । चेकजाँच गर्ने क्रममा उनीहरूका साथबाट ७.६५ मिमि पेस्तोल एकथान, म्यागजिन एकथान र सोको गोली १५ राउन्ड तथा कटुवा पेस्तोल एकथान र पाँच राउन्ड गोली बरामद गरिएको प्रहरीले जनाएको छ ।

यस्तै, उनीहरूका साथबाट नगद ११ हजार ६८० रुपैयाँ र भारतीय बैंकको एटीएम कार्ड समेत बरामद गरिएको थियो । सो मोटरसाइकलसहित आवश्यक कारबाहीका लागि उनीहरूलाई जिल्ला प्रहरी कार्यालय सर्लाहीमा बुझाइएको सशस्त्र प्रहरीका डीएसपी शैलेन्द्र थापाले जानकारी दिए ।