संखुवासभा । जिल्ला कारागार संखुवासभामा कुटपिटबाट मृत्यु भएका दुई कैदीको शव आफन्तले बुझ्न मानेका छैनन् ।

प्रहरीको कुटपिटपछि बुधबार बिहान संखुवासभाको मादी नगरपालिका–५ का २० वर्षीय विनोेद तोलांगी र नुवाकोटको ककनी गाउँपालिका–७ का २७ वर्षीय आकाश बलामीको मृत्यु भएको थियो । पीडित पक्ष र स्थानीय प्रशासनको सहमतिमा चार दिनपछि शनिबार दुई कैदीको शव परीक्षण भने गरिएको छ ।

पीडित पक्षसँग सहमतिपछि शनिबार दिउँसो शव परीक्षण गरिएको जिल्ला प्रहरी कार्यालय संखुवासभाका प्रहरी निरीक्षक सरोज खनालले जानकारी दिए ।

किटानी जाहेरीपछि शव परीक्षण गरिए पनि घटनामा संलग्नको नाम सार्वजनिक नगरेको भन्दै आफन्तले शव बुझेनन् ।

पीडितले किटानी जाहेरी दिएका आधारमा कारागारमा खटिएका प्रहरी सहायक निरीक्षक लक्ष्मी चौधरी र कारागार प्रमुख राजेन्द्र घिमिरेको नाम मात्र जिल्ला प्रहरी कार्यालयले शनिबार दिउँसो सार्वजनिक गरेको छ ।

अनुसान्धान टोलीले सीसीटीभी फुटेज बरामद गरे पनि घटनामा संलग्नलाई सार्वजनिक गर्न ढिलाइ गर्नु शंकास्पद रहेको पीडितको गुनासो छ । सीसीटीभी फुटेजका आधारमै कैदीलाई प्रहरीले कुटपिट गरेको तथ्य बाहिरिएको थियो ।

घटनालगत्तै पीडित पक्षले विरोध गरेपछि गृह मन्त्रालयले छानबिन समिति बनाएको थियो । घटनाको छानबिन गर्न गृह मन्त्रालयद्वारा साउन २४ गते कारागार व्यवस्थापन विभागका निर्देशक पाण्डेको संयोजकत्वमा समिति गठन गरिएको थियो । सो समितिले शुक्रबारदेखि छानबिन थालेको छ । रासस