काठमाडौं । अमेरिकाको हवाई राज्यको माउ टापुमा लागेको डढेलोमा परी मृत्यु हुनेको संख्या ६७ पुगेको छ । मृतकको संख्या ६७ पुगेको माउ टापुका अधिकारीहरूले बताएका हुन् ।

अहिले पनि आगो निभाउने प्रयास जारी छ । बुधबार ३६ जनाको मृत्यु भएको पुष्टि भएको थियो । बिहीबार थप १९ जनाको मृत्यु भएको पुष्टि भएको थियो ।

विपत्तिको चेतावनी दिने ‘इमर्जेन्सी साइरन’ नबज्दा जनधनको ठूलो क्षति भएको नागरिकको गुनसो छ । डढेलोले हवाईका ग्रामीण क्षेत्रमा बढी क्षति भएको छ । भवन, अस्पताल ध्वस्त भएका छन् । सयौँ परिवार विस्थापित भएका छन् ।

आगलागीबाट भएको क्षतिको पूर्ण विवरण आउन बाँकी छ । सम्बन्धित निकायका अधिकारीले स्थिति साम्य हुनेबित्तिकै क्षतिको मूल्यांकन गरिने बताएका छन् ।

दशकौँमा हुने यो प्राकृतिक विपत्तिमा सुनामीमा भन्दा धेरैले ज्यान गुमाएका छन् । यहाँ सन् १९६० को सुनामीमा ६१ जनाको मृत्यु भएको थियो । त्यसको १४ वर्षअघिको सुनामीमा १६० जनाले ज्यान गुमाएका थिए ।

त्यसपछि आपत्कालको सूचना दिन सहरबजारमा साइरन जडान गर्न थालिएको थियो । तर, योपटक वनबाट फैलिएको आगोले माउलाई जलाउँदा ती साइरन किन बजेनन् भन्ने उत्तर हवाईका नागरिकको प्रश्न छ । सिन्ह्वा/न्युज एजेन्सी नेपाल