काठमाडौं । नेपाल नागरिक उड्डयन प्राधिकरणले आजदेखि सिम्रिक एयरको सबै उडान बन्द गरिदिएको छ । प्राधिकरणलाई तिर्नुपर्ने बक्यौता नतिरेपछि उडानमा रोक लगाइएको हो । पछिल्लो दुई आर्थिक वर्षको बक्यौता रकम तिर्न बाँकी रहेपछि प्राधिकरणले उडानमा रोक लगाएको हो । प्राधिकरणका अनुसार सिम्रिक एयरले प्राधिकरणलाई ४६ लाख रुपैयाँ बक्यौता रकम तिर्न बाकी छ ।

सिम्रिक एयर त्यही कम्पनी हो, जसलाई करिब दुई महिनाअघि संस्कृति, पर्यटन तथा नागरिक उड्डयनमन्त्री सुदन किरातीले निजी क्षेत्रबाट पहिलोपटक हेलिपोर्ट निर्माण गर्ने सैद्धान्तिक सहमति दिएका थिए । सरकारले सिम्रिक एयरलाई काभ्रेपलाञ्चोक जिल्लाको बनेपा नगरपालिका–१४, राउतगाउँको माथिल्लो भाग इटापुडाँडामा हेलिपोर्ट निर्माण गर्न गत जेठ २६ गतेको मन्त्रीस्तरीय निर्णयद्वारा सहमति दिइएको थियो ।

मन्त्री किरातीले सिम्रिक एयरको निवेदनका आधारमा नै बिनाप्रतिस्पर्धा हेलिपोर्ट निर्माण गर्ने सैद्धान्तिक सहमति दिएका थिए । मन्त्रालयले नेपाली सेनाको राय सुझावलाई बेवास्था गर्दै सिम्रिक एयरलाई हेलिपोर्ट बनाउने निर्णय दिएको थियो ।

नेपाली सेनाले वैशाख ६ मा विभिन्न आन्तरिक सुरक्षा, तस्करी तथा गैरकानुनी गतिविधि निगरानी/नियन्त्रण गर्ने काम चुनौतीपूर्ण हुने उल्लेख गर्दै सुरक्षा संवेदनशीलता बढ्न जाने भएकाले निजी कम्पनीलाई हेलिपोर्ट निर्माण र सञ्चालन गर्न दिन नहुने सुझाव दिएको थियो ।

रक्षा मन्त्रालयले अध्ययन गरेर मात्रै अनुमति दिन सुझाव दिए पनि उक्त सुझावको बेवास्ता गर्दै सिम्रिकलाई हेलिपोर्ट निर्माण गर्न स्वीकृति दिएपछि मन्त्री किरातीको उक्त निर्णय विवादमा तानिएको थियो ।

पछि नियामक निकाय नेपाल नागरिक उड्डयन प्राधिकरणले मन्त्रालयलाई एक पत्र बुझाउँदै निजी क्षेत्रलाई हेलिपोर्ट निमार्ण गर्न दिने मन्त्रालयको निर्णय कानुनी र प्राविधिक रूपले कार्यान्वयन गर्न सम्भव नरहेको जनाएको थियो ।

प्राधिकरणले निजी क्षेत्रबाट हेलिपोर्ट निर्माण तथा सञ्चालन हुँदा सुरक्षा चुनौती बढ्न सक्ने बताएको थियो । सुरक्षा चुनौतीहरू विश्लेषण गरेर मात्र हेलिपोर्ट निर्माण कार्य अगाडि बढाउन उपयुक्त हुने प्राधिकरणको सुझाव थियो ।

साथै, अति संवेदनशील कार्यहरू सरकारबाहेक अन्य निकायलाई समानान्तर हुने गरी दिँदा सुरक्षाको दृष्टिकोणले उपयुक्त नहुने प्राधिकरणको दाबी थियो । महत्त्वपूर्ण र संवेदनशील मानिने हवाईका भौतिक पूर्वाधार निर्माण गर्दा सतर्कता अपनाउनुपर्ने प्राधिकरणले जनाएको थियो ।