काठमाडौं । उपप्रधान तथा गृहमन्त्री नारायणकाजी श्रेष्ठले सुन तस्करी घटनाले संगठित अपराधको जालो बढाउने काम गरेको बताएका छन् । मंगलबार प्रतिनिधिसभाको रोस्टममा उभिएर उठेका प्रश्नहरुको जवाफ दिँदै उनले सुन तस्करी प्रकरणले राष्ट्रिय सुरक्षा संवेदनशीलता बढाएको बताए ।

“यसले हाम्रो देशको प्रतिष्ठा र छविमा साह्रै नकारात्मक असर पुर्‍याएको छ । राजस्वमा नकारात्मक असर पुर्‍याएको छ । यसले हाम्रो अर्थतन्त्रमा समस्या पैदा गरेको छ । हुण्डीलगायत पाटाहरुलाई प्रोत्साहित गरेको छ,” उनले भने, “संगठित अपराधको जालो बढाउने, राष्ट्रिय सुरक्षाको संवेदनशीलतालाई ध्यानाकर्षण गराएको छ । चुनौतीप्रति गम्भीर बन्न प्रेरित गरेको छ ।”

उनले तस्करी प्रकरणले छिमेकी राष्ट्रहरुको अर्थतन्त्रमा पनि नकारात्मक असर पुर्‍याउने काम गरेको बताए । साथै, उनले दोषीलाई हरहालतमा कारबाहीको दायरमा ल्याउने बताए । उनले सुन तस्करीमा नेपाललाई 'ट्रान्जिट पोइन्ट' बनाउने काम भइरहेको बताए ।