काठमाडौं । नेकपा (एकीकृत समाजवादी)का सांसद मेटमणि चौधरीले जुनसुकै अपराधमा जोडिएकाहरूको अनुहार जनताले हेर्न चाहेको बताए । मंगलबार प्रतिनिधिसभा बैठकको आकस्मिक समयमा उनले एक क्विटल सुन प्रकरणमा छानबिन अघि बढिरहेको समयमा त्यसलाई प्रभावित गर्न नहुने बताए । 

“जुनसुकै तरिकाले होस्, सुन काण्डलगायत थुप्रै अपराधमा संलग्नहरूलाई नेपाली जनताले देख्न पाउनुपर्छ र कारबाहीको दायरामा ल्याउनुपर्छ,” उनले भने, “गिरीबन्धु टी स्टेट, नक्कली भुटानी शरणार्थी प्रकरणलगायतका विषयको पनि छानबिन हुनुपर्छ ।”

साथै उनले संसदीय छानबिन समितिको नाममा अनुसन्धन प्रभावित हुने काम गर्न खोजिएको त हैन भन्ने प्रश्न समेत गरे । चौधरीले पूर्वउपप्रधानमन्त्री र गृहमन्त्रीलाई जेल पठाउने सीआईबीका छानबिन प्रक्रियामा किन अविश्वास भन्दै प्रश्न पनि गरे । 

“भीआईपी ठानिएको पूर्वगृहमन्त्री, उपप्रधानमन्त्री जेलको चिसो छिडीमा छन् । सीआईबीको विषयमा प्रश्न उठाएका छौँ । तर नेपाल सरकारले निर्माण गरेको संस्था र यही सांसदले कानुन निर्माण गरेर बनाएको संस्था भएकाले त्यसप्रति विश्वास गरौँ,” चौधरीले भने, “छानिबन समिति भन्दा पनि यो संयन्त्रलाई काम गर्न दिऔँ । छानबिन समिति भनेर त्यो विषमया प्रश्नहरू उठाएर डाइभर्ट गराउने कुरा हो कि भन्ने कुरा लागेको छ । थुप्रै विषमया संसदीय छानबिन समिति बनायौँ । कुनै समतिको रिपोर्ट सार्वजनिक गर्‍यौँ ? गरेनौँ ।”

प्रमुख सचेतक चौधरीले प्रमुख तीन दलले संसद्लाई बन्धक बनाउने काम पनि गरेको बताए । 

“संसद् जनताको करेन्ट इस्यूमा छलफल हुने थलो बन्नुपर्दथ्यो । तर, हामीले आफूसँग जोडिएको स्वार्थका कारणले सबै सांसदहरूको हक अधिकार छिन्ने गरियो,” उनले भने, “तीनवटा दलका शीर्ष नेतहरूले संसद्लाई बन्धक बनाउने काम गरको छौँ । यसले जनताको समस्या सम्बोधन गर्ने काम ओझेलमा पारिएको छ । यसमा करेक्सन गरेर जानुपर्छ । सभामुखले निर्देशन गर्नुपर्छ ।”