काठमाडौं । राष्ट्रिय स्वतन्त्र पार्टीका सभापति रवि लामिछानेले शीर्ष नेताबीच भागबण्डा भएपछि संसद् चल्ने गरेको बताएका छन् ।

आजको प्रतिनिधिसभा बैठकमा उनले संसदीय समितिको भागबण्डा मिलेर आज संसद् चल्न सहज भएको अनुमान समेत गरे । उनले संसदीय समितिमा ठाउँ नभएकाले आफ्नो पार्टी सैद्धान्तिक रुपमा प्रमुख प्रतिपक्षी भएको समेत बताए ।

“समाचारमा आएअनुसार संसदीय समितिको भागबण्डा मिलिसक्यो होला । सायद त्यही भागबण्डा मिलेर नै आज संसद् सहज भएको हुनसक्छ । यदि त्यसो हो भने हामी खुसी छौँ,” उनले भने, “राष्ट्रिय स्वतन्त्र पार्टी सैद्धान्तिक रुपमा प्रमुख प्रतिपक्षी बन्न गयो । जसलाई कुनै पनि संसदीय समितिमा ठाउँ छैन । यसबाट हामी चिन्तित छैनौँ ।”

उनले ललितानिवास प्रकरणमा सर्वोच्च अदालतको आदेशपछि पूर्वप्रधानमन्त्री माधवकुमार नेपाल भोलिपल्टै विदेश जान पाएकोमा आशंका समेत व्यक्त गरे ।

संसदीय समितिमा नेकपा (एमाले)ले तीन सभापति पाएको छ । सुन तस्करी प्रकरणमा संसदीय समिति बनाउनुपर्ने माग गर्दै आएको एमाले आज सदन चलाउन सहमत भएको छ ।