काठमाडौं । कोलम्बियाले फिफा महिला विश्वकपको इतिहासमा पहिलोपटक क्वार्टरफाइनलमा स्थान बनाएको छ ।

मंगलबार अस्ट्रेलियाको मेलबर्नस्थित मेलबर्न रेक्टेङ्गुलर रंगशालामा सम्पन्न खेलमा जमैकाविरुद्ध १–० को जित निकाल्दै कोलम्बियाले पहिलोपटक विश्वकपको अन्तिम–आठको यात्रा तय गरेको हो । सन् २०११ को संस्करणदेखि विश्वकप खेलेको कोलम्बियाले यसअघि २०१५ मा प्रि–क्वार्टरफाइनल खेल्नु नै अहिलेसम्मको ठूलो सफलता थियो ।

कोलम्बियाको जितमा क्याटालिना उस्मेले गरेको गोल निर्णायक बन्यो । उस्मेले खेलको ५१औँ मिनेटमा गरेको गोलबाट कोलम्बियाले अग्रता बनाएको थियो ।

कोलम्बियाले अब सेमिफाइनल प्रवेशका लागि इंग्ल्यान्डको सामना गर्नेछ ।

प्रतियोगितामा कोलम्बिया समूह ‘एच’को विजेता बन्दै अन्तिम–१६ मा प्रवेश गरेको थियो । जमैका भने समूह ‘एफ’को उपविजेताको रुपमा प्रि–क्वार्टरफाइनलमा प्रवेश गरेको थियो ।