काठमाडौं । कथाकार रामचन्द्र नेपालको कथाकृति ‘बस्तीमा कुहिरो’ लोकार्पण गरिएको छ ।

मंगलबार काठमाडौंमा ओरिएन्टल पब्लिकेसनद्वारा आयोजित कार्यक्रममा प्रमुख अतिथि प्रसिद्ध हास्य अभिनेता मदनकृष्ण श्रेष्ठ लगायतले उक्त कथाकृति सार्वजनिक गरे ।

कार्यक्रममा समीक्षक महेश पौड्यालले जिन्दगीका यथार्थहरू कथाकृतिमा पाठकले पाउने बताए । उनले पूर्व मेचीदेखि पश्चिम महाकालीसम्मका कथानकता यस कृतिले दिएको उल्लेख गर्दै विशेषगरी सुदूरपश्चिमको समाज, त्यस भेगको सीमा क्षेत्रका कथाहरू यसभित्र भेटिने बताए ।

अर्का समीक्षक डा. समीक्षा अर्यालले कथाकृतिभित्र रहेका १८ वटा कथाहरूले सिंगो नेपालको समाजलाई बोकेको बताइन् ।

कार्यक्रममा मदनकृष्ण श्रेष्ठ, हरि गौतम, प्रतीक ढकाल, डा. शैलेन्दुप्रकाश नेपाल, मनोज गजुरेल, रामचन्द्र नेपाल, देव नेपाल, अनिलकुमार उपाध्याय लगायतले बोलेका थिए ।