काठमाडौं । पछिल्ला वर्षमा सेयर बजारमा मन्दी छाएसँगै सेयर कारोबारबाट प्राप्त हुने पुँजीगत लाभकर पनि घटेको छ  । अघिल्लो आर्थिक वर्ष २०७८/७९ को तुलनामा गत आर्थिक वर्ष २०७९/८० मा सेयर कारोबारबाट प्राप्त हुने पुँजीगत लाभकर ७१.३१ प्रतिशतले घटेको हो ।

आर्थिक वर्ष २०७९/८० मा दुई अर्ब ९७ करोड पाँच लाख ८९ हजार ३७ रुपैयाँ राज्यले लाभकरमार्फत पाएको थियो । जसमा अल्पकालीन सेयर कारोबारमार्फत एक अर्ब ६४ करोड सात लाख ११ हजार ३९९ रुपैयाँ प्राप्त भएको छ ।

त्यस्तै, दीर्घकालीन सेयर कारोबार गर्ने लगानीकर्ताबाट भने एक अर्ब ३२ करोड ९८ लाख ७७ हजार ६३८ रुपैयाँ प्राप्त भएको सीडीएस एन्ड क्लियरिङ लिमिटेड (सीडीएससी)ले जानकारी दिएको छ ।

अघिल्लो आर्थिक वर्ष २०७८/७९ मा भने १० अर्ब ३५ करोड ३० लाख ५९ हजार ५१७ रुपैयाँ राज्यले सेयर बजारबाट पुँजीगत लाभकर प्राप्त गरेको थियो । जसमा सरकारले अल्पकालीन सेयर कारोबारबाट ६ अर्ब ४९ करोड ६५ लाख १८ हजार ७९८ रुपैयाँ आर्जन गरेको थियो भने दीर्घकालीन लगानीकर्ताबाट तीन अर्ब ८५ करोड ६५ लाख ४० हजार ७१९ रुपैयाँ प्राप्त गरेको छ ।

गत आर्थिक वर्षभरि नै बजारमा उतारचढाव देखिएकाले पनि पुँजीगत लाभकर कम उठेको आकलन गरिएको छ ।

सेयर बजारबाट प्राप्त हुने पुँजीगत लाभकर कम उठेसँगै लगानीकर्ताले पनि पुँजीबजारबाट कमाएनन् । पछिल्ला पाँच वर्षको तथ्यांक हेर्दा सरकारलाई आर्थिक वर्ष २०७७/७८ मा हालसम्मकै बढी पुँजीगत लाभकर प्राप्त भएको छ । सो वर्ष पुँजीगत लाभकरवापत १४ अर्ब १३ करोड ६१ लाख ५३ हजार ५३ लाख रुपैयाँ प्राप्त भएको थियो ।

आर्थिक वर्ष २०७६/७७ मा ९८ करोड ५२ लाख ८६ हजार ५३४ रुपैयाँ पुँजीगत लाभकर प्राप्त भएको थियो । त्यस्तै, आर्थिक वर्ष २०७५/७६ मा ६१ करोड दुई लाख ७४ हजार ६१६ रुपैयाँ मात्र सेयर बजारबाट पुँजीगत लाभकर प्राप्त भएको थियो ।