काठमाडौं । नेपालमा जुवातास खेल्नेलाई प्रहरीले पक्राउ गर्छ । हरेक दिन प्रहरीले जुवातास खेल्ने यति व्यक्ति पक्राउ गरियो भन्दै विज्ञप्ति पनि जारी गर्छ । प्रहरीले जुवातास खेल्न नदिए पनि तास निर्माताहरुको लागि भने नेपाल ठूलो बजार रहेको पाइएको छ ।

भन्सार विभागका अनुसार गत आर्थिक वर्ष २०७९/८० मा मात्र विभिन्न देशबाट नेपालमा २१ करोड २७ लाख ९४ हजार रुपैयाँको तास भित्रिएको छ ।

२०७९ साउन १ गतेदेखि २०८० असार मसान्तसम्मको अवधिमा उक्त रकममा एक करोड ७७ हजार ९८९ प्रति तास नेपालले आयात गरेको छ । उक्त तास आयात गरेवापत सरकारले १३ करोड सात लाख ३४ हजार रुपैयाँ राजस्व प्राप्त गरेको छ ।

विभागका अनुसार आठ देशबाट नेपालले तास आयात गर्ने गरेको छ । गत आर्थिक वर्ष नेपालले ब्राजिल, चीन, भारत, जापान, मलेसिया, युनाइेटेड अरब इमिरेट्स, बेलायत र अमेरिकाबाट तास आयात गरेको थियो ।

नेपालले पछिल्लो एक वर्षमा चीनबाट मात्र १८ करोड ७६ लाख नौ हजार रुपैयाँको तास आयात गरेको छ । यस्तै, भारतबाट दुई करोड १५ लाख ९५ हजार र ब्राजिलबाट ३५ लाख ७९ हजार रुपैयाँको तास आयात गरेको भन्सार विभागको तथ्याङ्कले देखाउँछ ।

अघिल्लो आर्थिक वर्ष २०७८/७९ मा नेपालले २१ करोड ५४ लाख ४५ हजार रुपैयाँको एक करोड नौ लाख ६० हजार ५४७ प्रति तास आयात गरेको थियो ।