काठमाडौं । एएफसी कपको प्रारम्भिक छनोटका लागि मच्छिन्द्रले तयारी सुरु गरेको छ । क्लबले सोमबार पत्रकार सम्मेलनमार्फत प्रतियोगिताको तयारी सुरु गरेको जनाएको हो । 

मछिन्द्रले अगस्ट ८ मा भुटानको लिग च्याम्पियन पारो एफसीसँग त्रिपुरेश्वरस्थित दशरथ रंगशालामा खेल्नेछ । मछिन्द्रले हाल सातदोबाटोस्थित एन्फा कम्प्लेक्स र चर्च ब्वाइजको मैदानमा अभ्यास गरिरहेको छ । छनोटका लागि मुख्य प्रशिक्षक किशोर केसीले २३ खेलाडीलाई प्रशिक्षणमा राखेका छन् ।

क्लबले सहिद स्मारक ए डिभिजन लिग खेलेका खेलाडीसहित अन्य आठ खेलाडीलाई अनुबन्ध गरेको हो ।

आशिष चौधरी, आयुष घलान, एरिक विष्ट, लाकेन लिम्बू, मेसुके ओलोमोउ, सनिस श्रेष्ठ, रेजिन सुब्बा र रोहित सुब्बालाई क्लबले थप गरेको हो । आशिष, आयुष, एरिक, लोकन र सनिस राष्ट्रिय टोलीका सदस्य हुन् ।

यसैगरी कप्तान तथा गोलकिपर विशाल श्रेष्ठसहित, अभिषेक गुरङ, आफिज ओलावाले, आन्द्रेस निया, विजय भुजेल, विमल घर्तीमगर, देभेन्द्र तामाङ, दिवाकार चौधरी, करिम नुरैन, सौरभ लिम्बू, छिरिङ गुरुङ, उत्सव राई, प्रदीप भण्डारी र सुरज विक टोलीमा छन् ।

आठ खेलाडी थपिँदा लिगमा मछिन्द्रको प्रतिनिधित्व गरेका पुजन उपरकोटी, प्रशान्त अवस्थी, रन्जित धिमाल, सुजल श्रेष्ठ, निसेन सुब्बा, आशिष श्रेष्ठ, सागर थापा र नविन सिलवाल तथा विदेशी खेलाडी युता सुजुकी र चेन्चो ग्लेत्सेन टोलीमा स्थान बनाउन असफल भएका छन् ।

सहिद स्मारक ए डिभिजन लिगको उपाधि चर्च ब्वाइजले जितेपनि एएफसीको क्लब लाइसेन्स नहुँदा उपविजेता मछिन्द्रले यो अवसर पाएको हो । त्यसअघि पनि मछिन्द्रले नै एएफसी कप खेलेको थियो । तर, श्रीलंकाको क्लबसँग पराजित भएपछि मछिन्द्रले दोस्रो चरणमा स्थान बनाउन सकेन ।