काठमाडौं । नेपाल राष्ट्र बैंकका गभर्नर महाप्रसाद अधिकारीले सेयर धितोकर्जाको जोखिम भारको सीमा ५० लाखसम्मलाई १०० प्रतिशत कायम गर्ने बताएका छन् ।

हाल २५ लाखसम्मलाई १०० प्रतिशतमा गणना गर्दै आएको जोखिम भारको सीमा बढाइएको हो । त्यस्तै, ५० लाखभन्दा माथिको सेयर धितो कर्जाको हकमा १५० प्रतिशत नै जोखिम भार कायम हुने पनि अधिकारीले बताए ।

गभर्नर अधिकारीले मौद्रिक नीति २०८०/८१ को जानकारी दिन आयोजित प्रकार सम्मेलनमा बोल्दै सेयर बजारमा सकारात्मक समाचार प्रवाह होस् भनेर मात्र पुनरवलोकन भन्ने शब्द प्रयोग गरिएको बताए । तर, राष्ट्र बैंक सञ्चालक समिति सेयर धितो कर्जा, रियल स्टेट कर्जा तथा हायर पर्चेज कर्जाको जोखिम भारसम्बन्धी के व्यवस्था गर्ने भनेर स्पष्ट रहेको बताए ।

“हामीले सेयर धितोकर्जाको जोखिम भारको सन्दर्भमा आजभन्दा दुई वर्षअगाडि २५ लाखभन्दा सानो कर्जाको हकमा १०० प्रतिशतमात्रै र त्योभन्दा बेसीको हकमा १५० लागु हुने व्यवस्था गरेका थियौँ । त्यो २५ लाखको थ्रेसहोल्डलाई बढाएर हामीले ५० लाखसम्म बनाउने तयारी गरेका छौँ,” गभर्नर अधिकारीले भने, “यो विषयमा हामी चाँडोभन्दा चाँडो सर्कुलर ल्याउँछौँ । यसमा कोही पनि कफ्युजन नहुनुहोला । हामी यसमा स्पष्ट छौँ । छलफल पनि भएको हो । नकारात्मक कुरा मात्र नलेखौँ भनेर सीमा नतोकेका हौँ ।”

सर्कुलरले सबै कुरा समेट्ने पनि उनले जानकारी दिए ।