काठमाडौं । नेपाली कांग्रेसका सहमहामन्त्री जीवन परियारले कांग्रेसले दलित समुदायका नेतालाई टिकट नदिएको गुनासो गरेका छन् । आइतबार पार्टी केन्द्रीय समिति बैठकमाउनले हालसम्म दलित समुदायबाट तीनजनाले मात्रै प्रत्यक्षतर्फ टिकट पाएको बताए ।
उनले गएको निर्वाचनमा सुनसरीमा मीन विश्वकर्मा, उदयपुरमा लक्ष्मी परियार तथा बझाङमा प्रकाश स्नेहीलाई टिकट दिन पहल गर्दा पनि कसैले टिकट नपाएको गुनासो गरे ।
उनले पार्टी सुधारको बहस गर्न आवश्यक नरहेको आवाज सुनिएको पनि बताए । भ्रातृ संस्था बनाउँदा पनि पार्टीमा छलफल नभएको उनको गुनासो थियो ।
“पार्टी सुधारको बहस गर्न र राजनीतिक सन्तुलन आवश्यक छैन भने भनौँ । विचारणीय भनौँ । भ्रातृ संस्था, जनसम्पर्क समिति विभाग गठन कार्यसमितिको पूर्णता किन हुन सकेको छैन । भ्रातृ संस्था बनाउँदा छलफल गरियो तर एकपक्षीय भयो भन्ने छ,” उनले भने, “बाँकी भ्रातृ संस्थालाई पूर्णता गर्दा सल्लाह गरियोस् । जातीय भेदवभाव र छुवाछुतका कुरा आएका छन् । अहिलेसम्म तीनजनाले मात्रै प्रत्यक्ष दलित समुदायबाट टिकट पाएका छौँ । यसपालिको निर्वाचनमा दलितलाई टिकट दिइएन ।”
सहमहामन्त्री परियारले कांग्रेस मुलुकको नेता पार्टी भएकाले गरिमालाई कायम राख्नुपर्ने धारणा राखे । उनले बैठकलाई लाइभ गरेर राम्रो नभएको पनि बताए ।
“फेसबुक लाइभको भ्युज घटेको छ । यसले हाम्रा कुरा सुन्ने रुचि कम हुँदै आएको छ । अब जनताका कुरा सुनौँ । लाइभले व्यक्तिलाई फाइदा पुग्ला, तर पार्टीलाई फाइदा पुर्याउँदैन । केन्द्रीय सदस्य र पदाधिकाहरूलाई चिनाउने काम भने गरेको छ,” उनले भने ।
