काठमाडौं । महाकाली नदीमा आज पानीको जलस्तर बढ्ने सम्भावना रहेकाले तटीय क्षेत्रका बासिन्दालाई सतर्क रहन आग्रह गरिएको छ । 

जिल्ला प्रशासन कार्यालय बैतडीले भारतस्थित धौलीगंगा जलविद्युत् परियोजनाको बाँध आज बिहान ५ बजेदेखि बेलुका ८ बजेसम्म सिल्ट सफा गरिने भएकाले बाँधको ढोका खोल्दा महाकालीमा जलस्तर बढ्ने बताएको छ । 

“एनएचपीसी लिमिटेड, धौलीगंगा पावर स्टेशन, धारचुला, पिथौरागढ, भारत पक्षबाट पत्राचार भएको हुँदा मिति २०८०/०४/०६ गते बिहान ५ बजेदेखि बेलुका ८ बजेसम्म र तत्पश्चात समेत महाकाली नदीमा जलस्तर बढ्ने सम्भावना भएकोले महाकाली नदी किनार तटीय क्षेत्रका बासिन्दाहरुलाई पूर्वसतर्कता अपनाउन अनुरोध छ,” जिल्ला प्रशासन कार्यालय बैतडीले जारी गरेको विज्ञप्तिमा उल्लेख छ ।