काठमाडौं । त्रिभुवन अन्तर्राष्ट्रिय विमानस्थलबाट अवैध रूपमा लुकाई छिपाई बाह्य मुलुकतर्फ लैजान लागेको मुद्रासहित चारजना पक्राउ परेका छन् । 

अमेरिकी डलर ४१ हजार ४००, साउदी रियाल एक लाख १९ हजार ५००, ओमानी रियाल एक हजार ३५७, बहराइन दिनार ३०८ बरामद गरिएको प्रहरीले जनाएको छ ।  

पक्राउ पर्नेमा रूपन्देहीको तिलोत्तमा नगरपालिका–९, तुल्सीपुर घर भएका २४ वर्षीय अनिस थापासहित चारजना छन् । उनीहरूलाई बुधबार राति पक्राउ गरेको हो । 

हिमालयन एयरलाइन्सको उडानमार्फत् काठमाडौंबाट दुबई जान लागेका उनलाई विमानस्थलको अन्तर्राष्ट्रिय उडान तर्फको प्रस्थान होल्ड ब्यागेज चेकिङ एरियामा जाँच गर्ने क्रममा प्रहरीले पक्राउ गरेको हो  

लगेजभित्र प्लाष्टिकले ¥यापिङ गरी चाउचाउको बीचमा लुकाई लैजान लागेको अवस्थामा उक्त विदेशी मुद्रा फेला परेको हो । 

थप अनुसन्धान एवम् सोधपुछको क्रममा मुद्राहरू रूपन्देहीको तिलोत्तमा नगरपालिका–९ घर भएका ३८ वर्षीय दिपेश राना लगायतका व्यक्तिहरूले दिएको भन्ने खुल्न आएपछि रानालगायत तीनजनालाई त्रिभुवन अन्तर्राष्ट्रिय उडानतर्फको प्रस्थान पार्किङ एरियामा वाग्मती प्रदेश–०१–०२७ च ६२६६ नम्बरको गाडीमा बसिरहेको अवस्थामा फेला पारी उनीहरूलाई समेत पक्राउ गरिएको प्रहरीले जनाएको छ ।