काठमाडौं । पाकिस्तान र श्रीलंकामा हुने एसीसी एसिया कपको खेल तालिका सार्वजनिक भएको छ ।

बुधबार अन्तर्राष्ट्रिय क्रिकेट काउन्सिल (आईसीसी)ले प्रतियोगिताको तालिका सार्वजनिक गरेको हो ।

सार्वजनिक तालिकाअनुसार प्रतियोगिताको उद्घाटन खेलमा नेपाल र पाकिस्तानले प्रतिस्पर्धा गर्नेछन् । पाकिस्तानको मुल्तानमा हुने यो खेल अगस्ट ३० मा हुनेछ । यस्तै, नेपालले दोस्रो खेलमा सेप्टेम्बर ४ मा पाकिस्तानविरुद्ध श्रीलंकामा खेल्नेछ ।

प्रतियोगितामा नेपालसहित कुल ६ टिम सहभागी छन् । जसलाई प्रत्येक समूहमा तीन टिम रहने गरी दुई समूहमा विभाजन गरिएको छ । एसीसी प्रिमियर कपको विजेताको रूपमा एसिया कप प्रवेश गरेको नेपाल समूह ‘ए’ मा छ । यो समूहमा नेपालसँगै भारत र पाकिस्तान छन् ।

एसिया कप–२०२३ को आयोजना अधिकार पाकिस्तानले पाएको थियो । तर, राजनीतिक तिक्तताका कारण भारतले आफ्नो टिम पाकिस्तान पठाउन अस्वीकार गरेपछि प्रतियोगितालाई ‘हाइब्रिड मोडेल’ मा सञ्चालन गर्ने सहमति बनेको छ ।

जसअनुसार भारतबाहेक प्रतियोगितामा सहभागी सबै टिमले समूह चरणको एक खेलका लागि पाकिस्तानको यात्रा गर्नुपर्ने छ । र, भारतको सहित अन्य सबै खेलहरू श्रीलंकामा सञ्चालन हुनेछन् ।