काठमाडौं । अखिल नेपाल फुटबल संघ (एन्फा)ले नेपाली राष्ट्रिय टिमका खेलाडीले प्रयोग गर्ने जर्सी अनधिकृत रूपमा उत्पादन र बिक्री गर्नेविरुद्ध कानुनी प्रक्रिया अघि बढाउने चेतावनी दिएको छ । शुक्रबार (चैत २२) सूचना जारी गर्दै एन्फाले राष्ट्रिय टिमका खेलाडीले प्रयोग गर्ने ‘होम’ र ‘अवे’ जर्सीमा लोगो राखेर अनधिकृत उत्पादन गर्नेविरुद्ध कानुनी उपचार खोज्ने चेतावनी दिएको हो ।

“नेपाली राष्ट्रिय फुटबल टोलीका खेलाडीहरूले प्रयोग गर्ने होम तथा अवेको जर्सीहरूमा लोगो राखेर अनधिकृत रूपमा बजारमा जर्सीहरूको उत्पादन र बिक्री वितरण भइरहेको विवरणहरू अखिल नेपाल फुटबल संघ (एन्फा)मा प्राप्त हुन आएकाले विनाअनुमति भइरहेका त्यस्ता उत्पादन र बिक्री वितरण कार्यहरू गैरकानुनी भएको हुँदा सो कार्य नगर्न, नगराउन सबैका लागि यो सार्वजनिक सूचना जारी गरिएको छ,” एन्फाका प्रवक्ता सुरेश शाहले जारी गरेको सूचनामा उल्लेख छ ।

अनधिकृत रूपमा उत्पादित त्यस्ता जर्सी खरिद नगर्न समेत एन्फाले आग्रह गरेको छ ।