काठमाडौं । एसीसी मेन्स इमर्जिङ टिम्स एसिया कपमा श्रीलंका ‘ए’ विरुद्ध ओमान ‘ए’ २१७ रनले पराजित भएको छ ।

मंगलबार श्रीलंकाको आर प्रेमादासा रंगशालामा सम्पन्न खेलमा घरेलु टिमले प्रस्तुत गरेको २६० रनको लक्ष्य पछ्याउने क्रममा ओमान १७.१ ओभरमा ४२ रनमै समेटियो ।

श्रीलंकाको घातक बलिङसामु ओमानका कुनै पनि ब्याटर खुलेर खेल्न सकेनन् । ओमानका कश्यप प्रजापतिले १८ र सुरज कुमारले १० रन जोडे । यसबाहेक, ओमान कुनै पनि ब्याटरले दोहोरो अंकमा रन जोड्न सकेनन् ।

ओमानलाई सस्तैमा समेट्न श्रीलंकाका चमिका करुणारत्नेले तीन विकेट लिए । दुई ओभरमात्र बलिङ गरेका करुणारत्नेले तीन रनमात्र खर्चिए । दुनिथ वेलालागे, प्रमोद मदुसन र लहिरु समाराकुनले समान दुई विकेट लिए । सहन अराच्चिगेले एक विकेट लिए ।

त्यसअघि टस हारेर ब्याटिङमा आएको श्रीलंकाले निर्धारित ५० ओभरमा आठ विकेट गुमाएर २५९ रनको योगफल खडा गरेको थियो ।

श्रीलंकाका पसिन्दु सुरियावन्दराले ६० रन बनाएका थिए । सहन अराच्चिगेले ४८, लासिथ क्रोस्पुलेले ४२ र अभिस्का फर्नान्डोले २५ रन जोडे । कप्तान दुनिथ वेलालागेले २१, चमिका करुणारत्नेले २० र असेन बन्दाराले ११ रन जोडे ।

ओमानका अकिब इल्यासले चार विकेट लिएका थिए । जय ओडे«डा र आयान खानले समान दुई विकेट लिए ।

जितसँगै तीन खेलबाट चार अंक जोडेको श्रीलंका समूह ‘ए’ को शीर्ष स्थानमा उक्लिएको छ । समान खेल खेल्दा पनि अंकविहीन ओमान भने समूह चरणको अन्तिम खेल अगावै प्रतियोगिताबाट बाहिरिने निश्चित बनेको छ ।

प्रतियोगितामा नेपालसहित एसियाका आठ टिम सहभागी छन् । सहभागी टिमलाई दुई समूहमा विभाजन गरिएको छ । प्रतियोगिताको समूह ‘ए’मा ओमान, अफगानिस्तान, बंगलादेश र श्रीलंका छन् । समूह ‘बी’मा नेपाल, भारत, पाकिस्तान र युनाइटेड अरब इमिरेट्स (यूएई) छन् । समूहबाट शीर्ष दुई टिम सेमिफाइनलमा प्रवेश गर्ने छन् ।

सेमिफाइनल खेलहरू साउन ५ र फाइनल साउन ७ गते हुने छन् । प्रतियोगितामा नेपालबाहेक सबै टिमले ‘ए’ टोली पठाएका छन् ।