काठमाडौं । संघीय संसद्अन्तर्गत प्रतिनिधिसभामा १० विधेयक विचाराधीन छन् । ती विधेयकहरू विभिन्न विषयगत समितिमा विचाराधीन रहेका संसद् सचिवालयले जनाएको छ ।

संघीय संसद् सचिवालयका प्रवक्ता एकराम गिरीका अनुसार राज्य व्यवस्था तथा सुशासन समितिमा चार विधेयक विचाराधीन छन् ।

यस्तै, कानुन, न्याय तथा मानवअधिकार समिति र स्वास्थ्य तथा सूचना प्रविधि समितिमा दुई/दुई विधेयक विचाराधीन छन् । अन्तर्राष्ट्रिय सम्बन्ध समिति र कृषि, सहकारी तथा प्राकृतिक स्रोत समितिमा एक/एक विधेयक विचाराधीन रहेका प्रवक्ता गिरीले जानकारी दिए ।

गिरीका अनुसार प्रतिनिधिसभामा ६ विधेयक प्रक्रियामा छन् । “विभिन्न समितिमा १० वटा विधेयक विचाराधीन छ । प्रतिनिधिसभामा प्रक्रियामा त्योबाहेक ६ वटा विधेयक रहेको छ,” गिरीले भने ।

बेपत्ता व्यक्तिको छानबिन, सत्यनिरुपण तथा मेलमिलाप आयोग (तेस्रो संशोधन)सहितका विधेयक मानवअधिकार तथा कानुन समितिमा छ । कानुन समितिले विधेयक टुंग्याउन उपसमिति बनाएर सरोकारवाला निकायसँग छलफल गरिरहेको छ ।

कानुन समितिमै सम्पत्ति शुद्धीकरण निवारण तथा व्यावसायिक वातावरण प्रवर्द्धनसम्बन्धी केही ऐनलाई संशोधन गर्ने विधेयक पनि आएर अड्किएको छ ।

अनुगमन तथा मूल्यांकन विधेयक, संवैधानिक परिषद्सम्बन्धी विधेयक, अख्तियार दुरुपयोग अनुसन्धान आयोग (तेस्रो संशोधन) विधेयक र भ्रष्टाचार निवारण (पहिलो संशोधन) विधेयक राज्य व्यवस्था तथा सुशासन समितिमा छन् ।

अन्तर्राष्ट्रिय सम्बन्ध र पर्यटन समितिमा अभिलेख संरक्षण विधेयक छ । कृषि, सहकारी तथा प्राकृतिक स्रोत समितिमा खाद्य स्वच्छता तथा गुणस्तर विधेयक छ ।

आधा दर्जनजति बैठक बसिसकेको शिक्षा, स्वास्थ्य तथा सूचना प्रविधि समितिमा सार्वजनिक सेवा प्रसारण विधेयक र सुरक्षण मुद्रणसम्बन्धी विधेयक विचाराधीन छन् ।

समितिका सभापति चयन हुन बाँकी रहेकाले यी विधेयकहरूमाथि छलफल गर्न समस्या भएको सचिवालयको बुझाइ छ । समिति बैठकहरूमा हालसम्म गम्भीर प्रकृतिका विषयवस्तुमा प्रवेश नगरिएको प्रवक्ता गिरीले बताए ।

हाल ज्येष्ठ नागरिकका भरमा समितिका बैठक बस्दै आएको छ । “गम्भीर प्रकृतिका विषयवस्तुहरूमा समिति अहिले प्रवेश गरिहालेको अवस्था पनि देखिँदैन । सभापतिको निर्वाचन भइसकेपश्चात् सभापतिले नै समिति चलाउँदाखेरि समितिको सक्रियता, प्रभावकारिता अभिवृद्धि भएको पहिला पनि देखिएकै हो । तसर्थ, सभापतिको निर्वाचन भएपछि नै समितिले थप गति लिने हामीले विश्वास गर्न सक्छौँ,” उनले भने ।