काठमाडौं । सातौँ प्रधानमन्त्री कप महिला तथा पुरुष एनभीए राष्ट्रिय भलिबल क्लब लिगमा दर्शकमाथि हातपात गर्ने त्रिभुवन आर्मी क्लबका धनबहादुर भट्ट ६ महिनाको प्रतिबन्धमा परेका छन् ।

यही असार २५ गते गण्डकी प्रदेशविरुद्धको खेलका क्रममा दर्शकमाथि हातपात गरेका कारण नेपाल भलिबल संघले भट्टलाई ६ महिना खेलमा प्रतिबन्ध लगाएको हो ।

यस्तै, संघले नेपाली राष्ट्रिय टिमका कप्तान समेत रहेका आर्मीका हरिहजुर थापालाई उक्त जिम्मेवारीबाट मुक्त गर्ने निर्णय गरेको छ ।

त्यस दिन हातपातमा उत्रिएका राजेन्द्र बिष्ट र धनपति कुँवरलाई समान तीन महिना खेलमा प्रतिबन्ध लगाउने निर्णय पनि गरिएको छ ।

“खेल अनुशासनविपरीत काम गरेका कारण धनबहादुर भट्टलाई ६ महिना राष्ट्रिय तथा अन्तर्राष्ट्रिय खेल खेल्न नपाउने गरी कायम गरेका छौँ । यस्तै, नेपाली टिमका कप्तान समेत रहेका आर्मीका हरिहजुरलाई जिम्मेवारीबाट हटाउने र राजेन्द्र बिष्ट र धनपति कुँवरलाई समान तीन महिना प्रतिबन्ध गर्ने निर्णय भएको छ । र, आर्मीकै हरि अधिकारी र दुर्गा खड्कालाई यस्तो कार्य नदोहो¥याउन चेतावनी दिइएको छ,” नेपाल भलिबल संघका महासचिव एवं प्रवक्ता रोशन श्रेष्ठले बाह्रखरीसित भने ।