काठमाडौं । महिला, बालबालिका तथा ज्येष्ठ नागरिकमन्त्री सुरेन्द्रराज आचार्यले दुर्गम क्षेत्रका गर्भवती र सुत्केरी महिलाको हवाई उद्धारका लागि बजेट अभाव नरहेको बताएका छन् । बिहीबार राष्ट्रियसभा बैठकमा उनले यस्तो बताएका हुन् ।

आउँदो आर्थिक वर्षमा सो कार्यक्रमको प्रभावकारिता हेरेर परिमार्जन गरिने र निरन्तरता दिइने उनले उल्लेख गरे । उनले मन्त्रालयले हालसम्म ५३६ जनाको हवाई उद्धार गरिसकेको जानकारी दिए ।

“हालसम्म ५३६ जना दुर्गम क्षेत्रमा ज्यान जोखिममा परेका गर्भवती तथा सुत्केरी महिलाको हवाई उद्धार गरी महिलाहरूको जीवनरक्षामा सहयोग गरिएको अवस्था छ । आगामी आर्थिक वर्षमा कार्यक्रमको प्रभावकारिता अध्ययन गरी उक्त परियोजनालाई थप परिमार्जन गरी निरन्तरता दिने कार्यक्रम रहेको छ । यस कार्यक्रममा बजेटको कमी नरहेको जानकारी गराउन चाहन्छु,” उनले भने, “महिला, बालबालिका तथा ज्येष्ठ नागरिक मन्त्रालयलाई अपांगतामैत्री नमुना मन्त्रालयको रूपमा विकास गर्ने कार्य अगाडि बढिरहेको छ । संघ, प्रदेश र स्थानीय तहको समन्वय र सहकार्यलाई प्रभावकारी गराउनको लागि अन्तरतह समन्वय कार्यक्रम सञ्चालन गर्ने र मन्त्रालयबाट सञ्चालित कार्यक्रम र प्रवाह गरिएको ससर्त अनुदानको प्रभावकारिता सम्बन्धमा अनुगमन गर्न अन्तरमन्त्रालय एकीकृत अनुगमनको कार्यक्रम रहेको छ ।”

मन्त्रालयले दिएको ससर्त अनुदानको प्रभावकारिताको अनुगमन गरिने समेत उनले बताए ।