काठमाडौं । पछिल्ला पाँच कारोबार दिनलाई हेर्दा सेयर बजार झिनो अंकले घट्दै उच्च अंकले वृद्धि भएको छ । बुधबार नेप्से परिसूचक २५.३१ अंक बढेर बन्द भएको छ । यस दिन नेप्से परिसूचक १.२२ प्रतिशत वृद्धि भएर २०९७.५५ विन्दुमा बन्द भएको छ ।
पाँच कारोबार दिनमा नेप्से गत साताको अन्तिम कारोबार दिन बिहीबार ०.०६ अंकले घटेको थियो भने आइतबार नेप्से २८ अंकले बढेको थियो । त्यपछिका दुई कारोबार दिन सोमबार र मंगलबार नेप्से क्रमशः ०.८० अंक र ४.७३ अंक घटेर करोबार भएको थियो ।
मंगलबारको तुलनामा आज कारोबार रकम पनि वृद्धि भएको छ । आज तीन अर्ब १८ करोड रुपैयाँको सेयर कारोबार भएको छ । मंगलबार भने दुई अर्ब ८५ करोड रुपैयाँको सेयर कारोबार भएको थियो ।
आज म्युचुअल फन्ड, ऋणपत्रलगायत २८९ धितोपत्रको ८५ लाख चार हजार ३७८ कित्ता खरिद–बिक्री भएको छ ।
कारोबारमा आएका १३ मध्ये फाइनान्स र होटेल तथा पर्यटन समूहको परिसूचक घटेको छ । बाँकी समूहको परिसूचक बढेको छ । होटेल समूहको परिसूचक ०.८७ प्रतिशत र फाइनान्स समूहको परिसूचक १.९५ प्रतिशतले घटेको छ ।
सर्वाधिक परिसूचक वृद्धि हुनेमा हाइड्रोपावर समूह रहेको छ । यस समूहको परिसूचक ४.४१ प्रतिशतले वृद्धि भएको छ । शिवश्री हाइड्रोपावर, सीवाईसी नेपाल लघुवित्त वित्तीय संस्था र रिभर फल्स पावर लिमिटेडको सेयर मूल्य १० प्रतिशतले वृद्धि भएको छ ।
रावा इनर्जी डेभलपमेन्ट लिमिटेडको सेयर मूल्य भने १० प्रतिशतले घटेको छ । शिवम् सिमेन्टको सर्वाधिक मूल्यको सेयर कारोबार भएको छ । यस कम्पनीको ३३ करोड ९३ लाख रुपैयाँको सेयर खरिद–बिक्री भएको छ ।
