काठमाडौं । नेपाली कांग्रेसको केन्द्रीय समिति बैठक सरेको छ । एक वर्षपछि आजबाट सुरु हुने भनिएको बैठक अन्तिम समयमा आएर सारिएको हो ।

पार्टीका कार्यवाहक मुख्य सचिव डा. प्रदीप पौडेलले अब बैठक साउन २ गते बस्ने जानकारी दिएका छन् ।

पार्टी महामन्त्री विश्वप्रकाश शर्माले बैठकका विषयमा थप गृहकार्य आवश्यक भएकाले बैठक सारिएको जानकारी दिए । 

“सधैँ सभापति र महामन्त्री बसेर एजेन्डा सेट हुन्थ्यो । यसपटक उपसभापति र सहमहामन्त्री पनि बसेर छलफल भए र २ दिन अरू सार्ने कुरा भयो,” शर्माले बाह्रखरीसँग भने, “२९ र ३० संसद् हुन सक्छ । साउन मसान्त पनि भएन त्यसकारण २ गते पुर्‍याइएको हो ।”

शर्माले प्रधानमन्त्री पुष्पकमल दाहाल 'प्रचण्ड' पत्नी सीता दाहालको निधनका कारण भने बैठक नसारिएको बताए ।

“मलामी जाने र श्रद्धाञ्जली दिएपछि बैठकमा जान सकिन्थ्यो । बैठक चाहिँ थप तयारी गर्नका लागिनै सारिएको हो,” शर्माले भने ।

कांग्रेसले गएको वर्ष साउन २७ गते केन्द्रीय समिति बैठक राखेको थियो । त्यसपछि पटकपटक बैठक बोलाउँदै बैठक सार्ने गरिएको थियो ।

विधान सम्मत कांग्रेसको केन्द्रीय समिति बैठक प्रत्येक दुई महिनामा बस्नुपर्ने हुन्छ ।