काठमाडौं । नेकपा (एमाले)का अध्यक्ष केपी शर्मा ओलीले अहिलेको सरकारको तागत झुट बोल्ने र अफवाह फैलाउन रहेको बताएका छन् । वाग्मती प्रदेश संगठन कमिटीको सातौँ बैठकलाई सम्बोधन गर्दै उनले सरकारले हल्ला फैलाउने काम मात्रै गरेको बताए ।

ओलीले अहिलेको सत्ता गठबन्धनमा उस्तै उस्तै दलहरु रहेकाले गठबन्धन कायम गर्न चाहिरहेको पनि बताए । “सरकारको तागत झुट बोल्ने, अफवाह फैलाउने देखियो,” ओलीले भने, “उस्तैउस्तै मिलेकाले, गठबन्धन भएकाले गठबन्धन कायम राख्न चाहन्छन् ।”

ओलीले एमालेको नीति प्रष्ट रहेको बताए । उनले एमालेको नजर सरकारतिर नरहेको बताए । भने, “हामी सरकारतिर हेर्दैनौँ । मिसन ०८४ मा जान्छौँ । हाम्रा नीतिहरु स्पष्ट छन् ।”

ओलीले अहिलेको सत्ता गठबन्धन एमालेविरुद्ध हल्ला फैलाउन लागिपरेको पनि बताए । उनले आफूहरुलाई बदनाम गराउने कदम चालिएको बताए । भने, “हल्ला गर्छन के के न भनेर । उहाँहरुलाई बदनाम गर्न मन लाग्छ । एमालेविरुद्ध हल्ला फैलाउन मन लाग्छ । हामी स्पष्ट हुनुपर्छ ।”

उनले एमालेकै नेता कार्यकर्ता पार्टीको प्रचारमा नलागेको पनि बताए । “प्राय साथीहरु हाम्रा कामबारे भन्नुहुन्न । सरकारमा हुँदा यो गरियो भनेर कोही बोल्दैन । हामीले गरेको काम भन्नुपर्याे,” उनले भने ।

ओलीले पशुपतिको जलहरुको विषयमा पनि झुटा कुरा फैलाइएको बताए । सुनको जलहरीलाई पित्तलको चनिएको उनको भनाइ छ । “सुनको जलहरी होइन, पित्तल चढाए भनेर तामिल गरेर संसद्मा लगिन्छ । झुटा अफवाह फैलाएबापत लाज सरम छैन ।”