काठमाडौं । राष्ट्रियसभा सदस्य अनिता देवकोटाले राष्ट्रिय गौरवका आयोजना समयमै सम्पन्न नगर्ने ठेकदार कम्पनीलाई कडा कारबाही गर्न सरकारसँग माग गरेकी छन् । मंगलबार राष्ट्रियसभा बैठकमा उनले यस्तो माग गरेकी हुन् ।

सांसद देवकोटाले समयमै सम्पन्न नगर्ने भए राष्ट्रिय गौरवका आयोजनाको नामकरण नगर्न पनि सरकारलाई सचेत गराइन् ।

उनले राष्ट्रिय गौरवका आयोजनामा चरम भ्रष्टाचार मौलाएको बताइन् । यसलाई नियन्त्रण गर्न सरकार गम्भीर बन्नुपर्नेमा उनले जोड दिइन् ।

“राष्ट्रिय गौरवका आयोजनाहरू अत्यन्तै भ्रष्टाचारले युक्त छन् । चरम बेथितिमा छन् । नेपाल विकासका आधारशीलाको रूपमा रहेको यी आयोजनाहरू समयमै सम्पन्न गर्न सक्ने हो भने कोसेढुंगा सावित हुन्छ । तर, यी आयोजनाहरू हामीले सम्पन्न गर्न सकिरहेका छैनौँ,” उनले भनिन् “राष्ट्रिय गौरवका आयोजनाहरू भन्ने तर समयमा सम्पन्न नगर्ने हो भने राष्ट्रिय गौरवका आयोजनाको नामाकरण नगरौँ भन्ने म निवेदन गर्न चाहन्छु । त्यसैले राष्ट्रिय गौरवका आयोजनाहरू समयमै सम्पन्न गर्र्नेलाई पुरस्कार र नसक्नेलाई दण्डको व्यवस्था गर्न सक्यौँ भने निश्चय नै समयमै सम्पन्न हुन्छ भन्ने मलाई लाग्दछ । त्यतातर्फ सरकारको ध्यान जान जरुरी छ भन्ने मलाई लाग्दछ ।”

सांसद देवकाटाले निर्माणाधीन सडक आयोजनाका लागि आवश्यक बजेटको व्यवस्था नगरेको भन्दै सरकारप्रति आक्रोश समेत व्यक्त गरिन् ।