रुपन्देही । रुपन्देहीको कालीदह नाका हुँदै भारत लैजाँदै गर्दा बरामद भएको साढे दुई केजी सुनको अनुसन्धानका क्रममा बुटवलका सुन व्यवसायीको संलग्नता भेटिएको छ ।

नाका हुँदै यही असार १० गते भारततर्फ लैजाँदै गर्दा सशस्त्र प्रहरीले इँटाजस्तै रङ र आकारको झन्डै साढे दुई किलोको शंकास्पद वस्तु बरामद गरेको थियो । अनुसन्धान गर्दा इँटाजस्तो उक्त वस्तु एक केजी ९६५.३ ग्राम तौलको सुन प्रमाणित भएको थियो ।

रुपन्देहीको लुम्बिनी सांस्कृतिक नगरपालिका–१३ स्थित कालीदह नाका हुँदै भारततर्फ जान लागेको बा१२च ३८२० नम्बरको मारुती सुजुकी कारलाई सशस्त्र प्रहरीको सीमा सुरक्षा गुल्मको टोलीले चेकजाँच गर्दा सो सुन बरामद गरिएको थियो ।

• दुई किलो सुनसहित एकजना पक्राउ

उक्त सुन प्रकरणमा बुटवलको अमरपथस्थित बालाजी सुनचाँदी पसल र लक्ष्मीपति सुनचाँदी पसलका सञ्चालकको संलग्नता देखिएपछि ती पसल ‘सिल’ गरेर अनुसन्धान अगाडि बढाएको छ ।

सुन बरामद गर्दा पक्राउ परेका व्यक्तिका बयानका आधारमा बालाजी र लक्ष्मीपति सुनचाँदी पसलको पनि संलग्नता रहेको प्रारम्भिक अनुसन्धानबाट खुलेकाले दुवै पसलमा सिल गरी थप अनुुसन्धान अघि बढाइएको भैरहवा भन्सार कार्यालयका प्रवक्ता युवराज भट्टराईले बताए ।

“सुन बरामदका विषयमा को कसको संलग्नताका विषयमा अनुसन्धान जारी छ । यसबारेमा सबै कुरा अहिलै भन्न सकिँदैन,” उनले भने, “पसललाई सिल गरी अनुसन्धान भइरहेको छ । पछि यसबारे जानकारी आउँछ ।”

कालीदह नाकामा सुनसहित पक्राउ परेका दाङको घोराही उपमहानगरपालिका–१० का हुमानन्द गिरीविरुद्ध जिल्ला अदालतबाट म्याद थप गरी अनुसन्धान भइरहेको छ । रासस