काठमाडौं । अमेरिकाको तल्लो सदन कांग्रेसका एक रिपब्लिकन सदस्यले राष्ट्रपति डोनाल्ड ट्रम्पद्वारा लगाइएको कर रोक्न कांग्रेसलाई अधिकार दिने सम्बन्धी एक कानुन ल्याउन लागेको जानकारी दिएका छन् । 

रिपब्लिकन पार्टीका तर्फबाट कांग्रेसका सदस्य डन बेकनले एक्सियोस पत्रिकालाई बताएअनुसार उक्त कानुन यसअघि प्रस्ताव गरिएको व्यापार समीक्षा ऐन २०२५ को एक भाग हो । 

यो कदम अमेरिकी राष्ट्रपति ट्रम्पले घोषणा गरेको व्यापक आयात करको प्रतिक्रियास्वरुप अमेरिकी सेयरमार्केटमा गिरावट आएपछि उठाइएको बताइएको छ ।

यो नयाँ कानुनको प्रावधानमा राष्ट्रपतिले कुनै पनि नयाँ आयात कर घोषणा गर्दा त्यसको ४८ घण्टाभित्र कांग्रेसलाई सूचना दिनुपर्ने र प्रशासनको तर्क र यसको आर्थिक प्रभावको विश्लेषण पेस गर्नुपर्नेछ ।

त्यसपछि कांग्रेसले ६० दिनभित्र स्वीकृतिको प्रस्ताव पारित गर्नुपर्नेछ । अन्यथा त्यस्तो ट्यारिफ स्वतः समाप्त हुनेछ । यसबाहेक सांसदरूले कुनै पनि समयमा अस्वीकृतिको प्रस्ताव पारित गरी ट्यारिफ रद्द गर्न पनि सक्नेछन् ।

तर, अमेरिकाको तल्लो सदन (कांग्रेस) र माथिल्लो सदन (सिनेट) दुबैमा ट्रम्पको पार्टी रिपब्लिकनको नियन्त्रण भएकाले यो नयाँ कानुन पारित हुने सम्भावना कम रहेको बताइएको छ । बहुमतले पारित भए पनि ट्रम्पले यसलाई भिटो लगाएर निस्कृय पार्न पनि सक्छन् । भिटो लगाउन रोक्न यो दुवै सदनमा दुईतिहाइको बहुमत जुटाउनु पर्छ । 

यसैबीच, कांग्रेस डेमोक्र्याहरूले ट्रम्पको नयाँ करका कारण सृजना भएको राष्ट्रिय आपतकालीन अवस्था अन्त्य गर्न संसद (कांग्रेस)मा एक प्रस्तावमा मतदान गराउने योजना बनाएका छन् । 

सिनेटले यो हप्ता क्यानडा, मेक्सिको र चीनमा ट्रम्पले लगाएका कर रोक्ने सम्बन्धी एक प्रस्तावमा मतदान गरेको थियो । सो प्रस्ताव चार रिपब्लिकन सिनेटहरूले डेमाक्र्याट सिनेटहरूसँग मिलेर पारित गराएका थिए ।