काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले एनसेल बाह्रखरी गल्फले सुस्ताएको पोखराको पर्यटनलाई जगाएको स्मरण गरेका छन् । शनिबार काठमाडौंको गोकर्ण रिसोर्टमा 'एनसेल फर बिजनेस बाह्रखरी गल्फ तथा आर्थिक परिसंवाद'को उद्घाटन गर्दै आफू गण्डकी प्रदेशको मुख्यमन्त्री हुँदा नै बाह्रखरी मिडियासँग भावनात्मक सम्बन्ध जोडिएको स्मरण गरे ।

“बाह्रखरीसँग मेरो भावानात्मक सम्बन्ध २०७७ मा नै हो । त्यतिबेला कोभिडको महामारीमा थियौँ । गल्फ मुस्ताङमा आयोजना  गर्ने भन्नुभयो । तर, त्यहाँ सम्भव भएन,” उनले भने ।

त्यसपछि पोखरामा गल्फ हुँदा सुरक्षित रहेको सन्देश फैलिएको गुरुङले बताए । “पोखरा सुस्ताइरहेको थियो । सबैकुरा बन्द थियो । बाह्रखरीको आयोजनामा पोखरामा गल्फ हुँदा धेरैको उपस्थिति भयो,” उनले सम्झिए, “त्यसले गर्दा पोखरा सुरक्षित रहेछ भन्ने सन्देश संसारभर प्रचार भयो । सुतिसकेको पोखरालाई पर्यटन क्षेत्रमा जगाउने काम प्रयत्नले भएको थियो ।”

शनिबार बिहान सञ्चारमन्त्री गुरुङले टी–अफ गर्दै प्रतियोगिताको उद्घाटन गरेका हुन् । प्रतियोगितामा आज ९६ कर्पोरेट खेलाडीहरूले प्रतिस्पर्धा गर्दै छन् । 

प्रतियोगिता १८ होलमा स्टेबल फोर्ड फर्म्याटमा हुनेछ । यसको अर्थ कुनै पनि होलमा तोकिएको भन्दा बढी स्ट्रोक हान्न पाइने छैन । यस नियमले ठूलो प्रतियोगितामा समयको बचत गर्नेछ ।