काठमाडौं । करिब दुई किलो सुनसहित सशस्त्र प्रहरीले एकजनालाई पक्राउ गरेको छ । रुपन्देहीको लुम्बिनी सांस्कृतिक नगरपालिका–१३, कालीदहबाट शुक्रबार राति ती व्यक्तिलाई नियन्त्रणमा लिइएको सशस्त्र प्रहरीले जनाएको छ ।

पक्राउ पर्नेमा दाङको घोराही नगरपालिका–१० मा बस्दै आएका ३१ वर्षीय हुमानन्द गिरी छन् । सुनसहित नेपालबाट भारततर्फ जाँदै गरेको बा१२च ३८२० नम्बरको मारुती सुजुकी कार र त्यसका चालकलाई नियन्त्रणमा लिइएको हो ।

कारको गियर बक्समा फल्स बटम बनाई लुकाइछिपाइ लैजाँदै गरेको अवस्थामा सुन फेला पारेको सशस्त्र प्रहरीले जनाएको छ ।

सशस्त्र प्रहरीका अनुसार सो सुनको तौल एक किलो ९६५ ग्राम तीन मिलिग्राम र बजार मूल्य एक करोड ८५ लाख ६५ हजार ३५५ रुपैयाँ ४५ पैसा हुन आउँछ ।

गिरीलाई कार र बरामद सुनसहित आवश्यक कारबाहीका लागि भैरहवा भन्सार कार्यालयमा बुझाइएको सशस्त्र प्रहरीले जनाएको छ ।