काठमाडौं । नेपाली कांग्रेसका महामन्त्री गगनकुमार थापाले आफू कांग्रेस बदल्ने अभियानमा लागिपरेको बताएका छन् ।
एउटै व्यक्ति पाँच/छपटक प्रधानमन्त्री बन्ने विषयले कांग्रेस, नेकपा (एमाले) र नेकपा (माओवादी केन्द्र)जस्ता पुराना पार्टीहरूमा एकसाथ संकट देखिएको उनको भनाइ छ ।
शनिबार काठमाडौंमा कांग्रेस दोलखा–काठमाडौं सम्पर्क समितिले आयोजना गरेको एक कार्यक्रममा उनले डेमोक्रेसीमा एउटै व्यक्ति पटक–पटक प्रधानमन्त्री हुने अरू कुनै देश नभएको जिकिर गरे ।
कांग्रेस बदल्नका लागि आफू महामन्त्री पद त्याग गर्न पनि तयार रहेको उनले घोषणा गरे । दाग लागेको पार्टीको महामन्त्री बन्नुभन्दा सफा कांग्रेसको कार्यकर्ता भएर बस्न आफूलाई मन भएको उनले उल्लेख गरे ।
महामन्त्री थापाले कांग्रेस बदलिए मात्र देश बदलिने बताए । कांग्रेस बदल्ने अभियानमा जुटन पार्टीका नेता–कार्यकर्तालाई आग्रह पनि गरे ।
“...कांग्रेस बदलियो भने बदलिएको कांग्रेसले देश बदल्छ, हेर्नोस् । यो देश बदल्नैपर्छ । बदलिएको कांग्रेसले मात्रै यो काम गर्न सक्छ । तर, कांग्रेस बदल्न हामी प्रत्येक बदलिन तयार हुनुपर्छ । म बदलिन तयार छु,” उनले भने, “म बदलिन तयार छु भनेको मैले पटक–पटक भनेको छु– दाग लागेको कांग्रेसको महामन्त्री हुनुभन्दा सफा कांग्रेसको कार्यकर्ता मात्रै भएर बस्दा बडो मजा आउँछ । त्यो बदलिन म तयार हो । सबै तयार हुनुपर्छ ।”
कांग्रेस सकियो भनेर नआत्तिन पनि सिंगो पार्टीपंक्तिलाई आह्वान गर्दै उनले आफू बदलिएर देश बदल्ने अभियानमा जुटनुपर्नेमा जोड दिए ।
