काठमाडौं । नेकपा (एमाले)का सचेतक महेश बर्तौलाले राजनीतिक र नैतिक रूपमा वर्तमान सरकारको वैधता समाप्त भएको बताएका छन् ।
मंगलबार संसद् भवन नयाँ बानेश्वरमा सञ्चारकर्मीसँग उनले अर्थमन्त्री डा. प्रकाशशरण महतले रोस्ट्रममा उभिएर जिल्ला निर्वाचन कार्यालयको बजेट त्रुटिपूर्ण भयो भन्दै संशोधन गरेको उल्लेख गरे । त्योसँगै राजनीतिक र नैतिक रूपमा वर्तमान सरकारको वैधता समाप्त भएको उनको भनाइ छ ।
उनले सरकार सधैँ बहुमतमा हुने हुँदा बजेट जस्ताको तस्तै पारित गर्ने सामर्थ्य राख्नुपर्ने भन्दै त्यो संशोधनपछि संवैधानिक हिसाबले पनि सरकारको वैधता नहुने जिकिर गरे ।
नेकपा (माओवादी केन्द्र)का सचिव देवेन्द्र पौडेलले भने बहुमत हुँदासम्म सरकार रहिरहने भन्दै बजेट बहुमतले पारित हुने बताए । उनले बजेटका विषयमा कानुनी हिसाबले आवश्यक विषय सच्याउन सक्ने र संशोधन पनि गर्न सकिने तर्क गरे ।
नेपाली कांग्रेसका मुख्य सचेतक रमेश लेखकले विपक्षी दलले त्रुटिलाई औँल्याउने कुरा जायज भए पनि अतिरञ्जित ढंगले प्रस्तुत हुन नहुनेमा जोड दिए । उनले निर्वाचन आयोगलाई स्वतन्त्र र निष्पक्षका साथै बलियो बनाउन कांग्रेस अग्रसर नै हुने बताए ।
