विराटनगर । नेकपा (एकीकृत सामाजवादी) मोरङको नेतृत्व चयनमा विलम्ब भएको छ । तीन दिनअघि पार्टी अध्यक्ष माधवकुमार नेपालले विराटनगरको एउटा होटेलमा जिल्ला अधिवेशन उद्घाटन गरेका थिए । तर, अध्यक्ष पद र पदाधिकारीमा आकांक्षीको संख्या धेरै भएपछि नेतृत्व छान्न सकस भएको हो ।

छलफल लम्बिएपछि निर्वाचनसँग सम्बन्धित कागजात बोकेर केन्द्रीय नेता र प्रतिनिधिहरू अधिवेशनस्थल मनास्लु होटेलबाट तीनपैनीस्थित पार्टी कार्यालयमा सरेका छन् । अध्यक्षमण्डलका सदस्य ओसिम आलमले भने, “अध्यक्षसहित पदाधिकारीमा धेरैजना आकांक्षी हुनुभएकोले थप छलफल र सहमतिबाट नेतृत्व टुंगो लगाउने प्रयास भइरहेको छ ।”

बरगाछीस्थित मनास्लु होटेलमा गए राति (चैत २०)सम्म सर्वसम्मत नेतृत्व चयनको प्रयास गरिएको थियो । मिलाएर नेतृत्व छान्न समाजवादीका केन्द्रीय उपाध्यक्ष जगन्नाथ खतिवडा, वरिष्ठ नेता घनेद्र बस्नेत, केन्द्रीय सचिव बलदेव चौधरी, पोलिटब्युरो सदस्य महेश रेग्मीलगायत नेता खटिएका छन् ।

तर, बुधबार छलफलबिनै एकैपटक जिल्ला नेतृत्वको नाम टाँस्ने भनिएपछि प्रतिनिधिले विरोध गरेका थिए । त्यसपछि निर्वाचन समितिले मनोनयन फाराम वितरण गरेको थियो । निर्वाचनमार्फत नेतृत्व चयन गरिनुपर्ने मत बलियो भएपछि मनोनयनको कार्य अघि बढाएर सहमतिको प्रयासस्वरूप वार्ता थालिएको एक नेताले बताए ।

अध्यक्षका निम्ति निवर्तमान अध्यक्ष चन्द्रवीर राई, उद्धव पोखरेल, दीपक ढकाल, कविराज घिमिरे, पुरुषेत्तम सुवेदी, हितबहादुर थापा, पदम सुब्बा र ध्रुव डाँगीले मनोनयनपत्र दर्ता गराएका छन् । तर, मुख्य रूपमा पोखरेल र ढकालबीच प्रतिस्पर्धा भएको देखिएको छ ।

“अहिले पार्टी कार्यालयमा भइरहेको छलफलमा मुख्यतः दुईजनामध्ये को हुने भन्ने विषयमै छलफल केन्द्रित छ,” ती नेताले भने, “अन्य पदाधिकारीमा पनि दुई/दुईजनाबीच नै छलफल भइरहेको छ ।”

दुई उपाध्यक्षका निम्ति चारले उमेदवारी दर्ता गराएका छन् । एक सचिवका निम्ति पनि चारजना नै उमेदवार छन् । उपसचिवका निम्ति पाँचजनाले मनोनयनपत्र दर्ता गराएका छन् ।

जिल्ला कमिटीका धेरै सदस्य निर्विरोध निर्वाचित भइसकेका अध्यक्षमण्डलका सदस्य आलमले जानकारी दिए । उनले भने, “हलले अध्यक्षमण्डललाई जिम्मेवारी दिएको छ । क्षेत्रगत रूपमा जिल्ला सदस्य निर्विरोध हुनुभएको छ । अहिले अन्य पदमा समेत दुई/तीनवटा नाममा केन्द्रीत भई त्यसमै छलफल भइरहेको छ ।”

अध्यक्षमण्डलको अध्यक्षमा बलदेव चौधरी छन् । सदस्यमा ओसिम आलम, महेश रेग्मी, विद्या चाम्लिङ, सीता पौडेल, निलम ढुंगेल र सेमन्तराज भण्डारी छन् ।

६ क्षेत्रगत संरचनाबाट आउनेमध्ये अधिकांश जिल्ला सदस्य निर्विरोध निर्वाचित भइसकेका निर्वाचन समितिले जनाएको छ । समाजवादीको अधिवेशनमा ४३६ प्रतिनिधि सहभागी छन् ।

विराटनगरमा हालै सम्पन्न नेकपा (एमाले)को मोरङ जिल्ला अधिवेशनमा समेत नाम टाँस्ने प्रयासपछि प्रतिनिधिले विरोध गरेका थिए । त्यसपछि एमालेको नेतृत्व चयन निर्वाचन प्रक्रियाबाट गरिएको थियो । निर्वाचनमा संस्थापनइतर समूह विजयी भएको थियो ।