काठमाडौं । गत आइतबार सेयर बजारमा उछाल देखियो । नेप्से परिसूचक ६२ अंक बढ्यो भने कारोबार रकम साढे पाँच महिना यताकै उच्च भयो । आइतबार ६ अर्ब ४९ करोड रुपैयाँको सेयर कारोबार भएको छ । पुस २६ गते ७ अर्ब ६५ करोड रुपैयोँभन्दा बढीको सेयर कारोबार भएको थियो । 

आइतबार उच्च अंकले बढेको बजार सोमबार त्यसलाई निरन्तरता दिन साढे ११ अंकले बढ्यो । सोमबार नेप्से ०.५५ प्रतिशतले बढेर २१२९.४२ विन्दुमा बन्द भएको छ । सोमबार पाँच अर्ब ३१ करोड रुपैयाँको सेयर कारोबार भयो ।

केही दिन अघिसम्म लगातार घटेको नेप्से परिसूचक र कारोबार रकम एक्कासि बढ्दा आमलगानीकर्ता पनि उत्साहित भएका छन् । तर, कतिपय लगानीकर्ता यसलाई स्वाभाविक रूपमा लिन्छन् । 

गत वर्षको यही अवधिको सूचक हेर्दा पनि अहिलेको बढाइ मोटाएको भन्दा सुन्निएको देखिन्छ । गत वर्षको असार महिनामा पनि बजार एकैदिन ९४ अंकसम्म बढेको थियो । त्यस्तै, बजार बढ्ने मात्र हैन यो महिना एकैदिन बजार ४६ अंकले घटेको पनि छ । 

नेपाल स्टक एक्सचेन्ज (नेप्से)का अनुसार गत वर्षको असार १२ गते नेप्से परिसूचक ९४ अंक बढेर १९५६.९८ विन्दु कायम भएको थियो । सो दिन दुई अर्ब १९ करोड रुपैयाँको सेयर कारोबार भएको थियो । 

त्यस्तै, असारमा बैंक तथा वित्तीय संस्थाहरूमा तरलता सहज हुँदै जानुका साथै मौद्रिक नीतिप्रति लगानीकर्ता आशावादी हुँदै जाँदा पनि अन्य महिना भन्दा यस महिनामा नेप्से परिसूचक बढ्ने गरेको छ । 

गत वर्ष असार १२ गतेदेखि मौद्रिक नीति घोषणा हुने दिनसम्म बजार उच्च अंकले पाँच करोबार दिन बढेको थियो । असार १२ गते ९४.९२ अंक, असार १५ गते ४१.३९ अंक, असार १६ गते ७४.९४ अंक, असार १९ गते ५७.६५ अंक र असार २८ गते ५९.५४ अंकले परिसूचक वृद्धि भएको थियो । 

सो अवधिमा बजार उच्च अंकले बढेको मात्र छैन घटेको पनि छ । असार २७ गते नेप्से १११.७१ अंकले घटेको थियो । उक्त दिन नेप्सेमा नकारात्मक सर्किट लागेर कारोबार बन्दसमेत भएको थियो । त्यस्तै, यस अवधिमा नेप्से सात कारोबार दिन १० अंकभन्दा बढी अंकले घटेको तथ्यांक देखिन्छ । 

असार अन्तिममा सूचीकृत कम्पनीहरूले चौथो त्रैमासिक वित्तीय विवरण सार्वजनिक गर्ने भएकाले पनि राम्रा कम्पनीको सेयर खरिद गर्नेको चाप बढ्दा कारोबार र परिसूचक वृद्धि हुने गरेको छ ।

हाल बैंकहरूमा तरलता सहज हुँदै जाँदा सेयर बजारमा लगानीकर्ता उत्साहित भएर खरिदतर्फ लाग्ने गरेको लगानीकर्ता तिलक कोइराला बताउँछन् । अन्तरबैंकिङ ब्याजदर तीन प्रतिशतभन्दा कम भएकाले पनि अहिले बैंकमा तरलला सहज भएको कोइरालाको भनाइ छ । 

त्यस्तै, बैंकहरूले हाल लगानी गर्ने नयाँ क्षेत्र नखोजेकाले पनि सेयर बजारमा पैसा आएको उनको तर्क छ । मौद्रिक नीतिप्रति लगानीकर्ता आशावादी भएकाले बजारमा प्रभाव परेको कोइरालाको बुझाइ छ । 

चालु वर्षको उच्च विन्दु पार गर्न सक्छ नेप्सेले

गत आर्थिक वर्ष २०७८/०७९ को असार महिनाको नेप्से सूचक हेर्दा चालु आर्थिक वर्ष २०७९/०८० को असारमा पनि बजार केही बढ्ने संकेत देखिन्छ । नेपाल राष्ट्र बैंक साउनको पहिलो हप्ता मौद्रिक नीति सार्वजनिक गर्ने तयारीमा जुटेको छ । मौद्रिक नीति सार्वजनिक हुने दिनसम्म बजारमा व्यापक उतारचढाव आउने देखिन्छ । 

गएको पुस २५ गते नेप्से परिसूचक चालु आर्थिक वर्षकै उच्च विन्दुमा पुगेको थियो । सो दिन नेप्से २२११.७६ विन्दुमा पुगेर बन्द भएको थियो । 

चालु आर्थिक वर्षको उच्च विन्दु आसारमा तोडिन सक्ने पनि देखिन्छ । चालु आर्थिक वर्षको कारोबारमा सात अर्ब ५६ करोड रुपैयाँको सेयर कारोबार भएको थियो । नेप्से बढेसँगै कारोबार रकम बढ्ने भएकाले पनि कारोबार रकमको रेकर्ड असार महिनामा तोडिन सक्ने सम्भावना  छ ।

तर, नेप्से परिसूचकको हालसम्मको उच्च विन्दु भने ३१९८ रहेको छ । उक्त विन्दु नेप्सेका लागि स्वर्णिम विन्दु हो । यो विन्दु २०७८ भदौ २ गते कायम भएको थियो । उक्त दिन २१ अर्ब ३१ करोड रुपैयाँको सेयर कारोबार भएको थियो । 

त्यस्तै, उक्त विन्दु कायम गर्ने अघिल्लो दिन साउन ३१ गते हालसम्मकै उच्च मूल्यको सेयर खरिद बिक्री भएको थियो । सो दिन २१ अर्ब ६४ करोड रुपैयाँको सेयर कारोबार भएको थियो ।