काठमाडौं । जनता समाजवादी पार्टी (जसपा)का अध्यक्ष उपेन्द्र यादवले आफ्नो पार्टी नभएको भए नागरिकता समस्या कहिल्यै समाधान नहुने दाबी गरेका छन् । आइतबार पार्टीको विधान महाधिवेशनमा उनले जसपा नभइदिएको भए संघीयता पनि नआउने जिकिर गरे ।

“अहिले जनता समाजवादी पार्टी नभइदिएको भए नागरिकता समस्या नेपालमा कहिले पनि हल हुने थिएन । नेपालमा संघीयता कहिल्यै आउने थिएन । हिजोको मधेसी जनाधिकार फोरम भनेको आजको जनता समाजवादी पार्टी फोरम हो,” उनले, “यो पार्टी नभइदिएको भए धर्मनिरपेक्षता, समावेशिता जस्ता कल्पनाका कुरा हुने थिए ।”

उनले सरकार र गठबन्धन निरन्तर अघि बढ्नुपर्ने बताए । बजेटले जनतालाई निराश तुल्याएको यादवको भनाइ छ । अर्थतन्त्रलाई गति दिने बजेट नआएकाले जनता निराश भएको उनले बताए ।

सरकार जनताको हकहितमा अघि बढ्नुपर्ने बताउँदै यादवले जनताले सडकमा के बोलिरहेको छ भन्ने सुन्नुपर्ने धारणा राखे । कृषिलाई आधुनिकीकरण, व्यवसायिकीकरण र औद्योगिकीकरण गर्ने उनको भनाइ छ ।