काठमाडौं । आईसीसी क्रिकेट विश्वकप छनोटमा श्रीलंकाले आयरल्यान्डसामु ३२६ रनको लक्ष्य प्रस्तुत गरेको छ ।

आइतबार जिम्बाब्वेस्थित क्विन्स स्पोर्ट्स क्लबमा जारी खेलमा टस हारेपछि ब्याटिङमा आएको श्रीलंकाले निर्धारित ४९.५ ओभरमा सबै विकेट गुमाएर ३२५ रनको योगफल खडा गर्यो ।

श्रीलंकाका दिमुथ करुणारत्नेले १०३ रन बनाए । उनले १०३ बलमा आठ चौका प्रहार गरे । सदिरा समराविक्रमाले ८२ रन थपे । धनन्जय डी सिल्भाले अविजित ४२, चरिथा असलांकाले ३८ र पथुम निसांकाले २० रन जोडे ।

आयरल्यान्डका मार्क अडायरले चार विकेट लिए । ९.५ ओभर बलिङ गरेका अडायरले एक मेडन राख्दै ४६ रन खर्चिए । बेरी म्याकार्थीले तीन विकेट लिँदा गारेथ डेलानीले दुई विकेट हात पारे ।

समूह ‘बी’ मा रहेका दुवै टिमको यो तेस्रो खेल हो । समूहमा श्रीलंकाले यसअघिका दुवै खेलमा जित निकाल्दा आयरल्यान्ड भने जितविहीन छ ।

छनोट प्रतियोगितामा सहभागी १० टिमलाई दुई समूहमा विभाजन गरिएको छ । समूह ‘ए’मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन् । समूह ‘बी’मा युनाइटेड अरब इमिरेट्स (यूएई), श्रीलंका, स्कटल्यान्ड, आयरल्यान्ड र ओमान छन् ।

प्रत्येक समूहबाट शीर्ष तीन टिम सुपर सिक्समा प्रवेश गर्नेछन् । सुपर सिक्सबाट शीर्ष दुई टिम यसै वर्ष भारतमा हने एकदिवसीय विश्वकपका लागि छनोट हुनेछन् ।