काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले ०८४ सालको निर्वाचनमा आफ्नो पार्टीलाई पहिलो पार्टी बन्न कसैले रोक्न नसक्ने बताएका छन् । शनिबार काठमाडौंमा आयोजित पार्टीको धादिङ–काठमाडौं सम्पर्क भेलामा उनले यस्तो बताएका हुन् ।

उनले ०८४ को निर्वाचनमा पार्टीलाई मुलुकको पहिलो शक्ति बनाउनका लागि पार्टीका नेता–कार्यकर्ताले भने असल मानिसका लागि पद त्याग गर्ने हृदय र सोच लिएर अघि बढ्नुपर्नेमा जोड दिए ।

‘जान्नेलाई छान्ने’ काम गरिए राम्रा मानिस पदमा आउने र त्यसले पार्टीलाई पहिलो शक्तिका रूपमा स्थापित गराउने उनको तर्क छ ।

सभापति लामिछानेले आफ्नो पार्टीलाई कुनै पनि तागतले लडाउन नसक्ने जिकिर समेत गरे । लडे आफ्नै गोडामा अल्झिएर लड्ने हो भन्दै उनले त्यस्तो हुन नदिने गरी अघि बढ्न सिंगो पार्टीपंक्तिलाई आह्वान गरे ।

नयाँ पार्टी र व्यक्तिहरूबीच फाटो ल्याउन ठूला दलहरूले संगठित प्रयास गरिरहे पनि सफल हुन नदिने उनले बताए ।

सामाजिक सञ्जालमार्फत असहिष्णु व्यवहार प्रदर्शन नगर्न पनि उनले पार्टीका कार्यकर्ता र समर्थकलाई सचेत गराए । विपक्षको भन्दा माथि उठेर गालीगलौजको भाषा सामाजिक सञ्जालमा प्रयोग गरे त्यसको असर पार्टी र दलका नेतालाई समेत पर्ने भएकाले त्यस्ता काम गर्न नहुने उनको भनाइ छ ।

इमानमा रहेका दिनसम्म मात्र नेताहरूको बचाउमा लाग्न उनले सिंगो पार्टीपंक्तिलाई सचेत गराए । उनले सभ्य र शिष्ट ढंगले विपक्षीको आलोचना गर्न सक्नु नै पार्टीको हितमा हुने पटकपटक दोहोर्‍याए ।

“हाम्रा समर्थकहरू, हाम्रा सदस्यहरू सामाजिक सञ्जालमा असहिष्णु छन्, असाध्यै धेरै गालीगलौैज गर्छन् भनेर आरोप लागेको छ । अब त्यो आरोप खेपेर बस्न मिल्दैन । एउटा राजनीतिक दलका रूपमा समर्थकहरूले जे मन लाग्यो, त्यही भनिरहँदाखेरि त्यो दलको नेताहरूलाई त्यसको असर पर्छ । यो माया गर्नुहुने, समर्थन गर्नुहुने तपाईं साथीहरूका अगाडि नभने मैले कसका अगाडि भन्ने ? मैले तपाईंहरूलाई यति बिन्ती नगरे कसलाई गर्ने ?,” उनले भने, “पार्टी सभापतिको हैसियतले मैले फेरि पनि तपाईंहरूलाई भन्न चाहन्छु– आएका गाली, आलोचनाहरूलाई त्यो भन्दा तल गएर गाली गर्नु हुँदैन । हो, आफ्नो नेतालाई बचाउनुपर्छ । सबैले आफ्नो नेतालाई बचाउँछन् । आफ्नो नेता इमानमा रहेका दिनसम्म बचाउने हो । इमान छोडेको दिन कसैले बचाउनु पर्दैन । म यो पनि तपाईंहरूलाई भन्न चाहन्छु– इमानमा रहुन्जेल बचाउनुपर्छ । मात्रै यति हो कि सभ्य र शिष्ट ढंगले बचाइदिनुभयो भने – ओहो, रास्वपाका समर्थकहरू त कति शिष्ट भएछन् ! पहिला त कस्तो थिए, अहिले त कति राम्रा भएछन्, आलोचना त गर्छन्, सुन्छन्, तर कति सभ्य र शिष्ट ढंगले गर्छन् भनेर भन्ने वातावरण पनि हामीले नै बनाउनुपर्नेछ । त्यसकारण माया गर्न पनि जान्नुपर्छ साथीहरू ।”

भ्रष्टहरूलाई समाप्त पार्ने अभियानमा आफ्नो पार्टी दृढतापूर्वक लागिरहने प्रतिबद्धता समेत उनले दोहोर्‍याए ।