काठमाडौं । आईसीसी क्रिकेट विश्वकप छनोटमा ओमानले लगातार दोस्रो जित निकालेको छ । ओमानले बुधबार भएको खेलमा युनाइटेड अरब इमिरेट्स (यूएई) विरुद्ध पाँच विकेटको सहज जित निकालेको हो ।

जिम्बाब्वेको बुलावावे एथलेटिक क्लबमा भएको खेलमा यूएईले प्रस्तुत गरेको २२८ रनको लक्ष्य ओमानले ४६ ओभरमा पाँच विकेट गुमाएर भेटायो ।

ओमानको जितमा अकिब इल्यासले ५३ रन बनाए । सोएब खानले अविजित ५२ रन जोडे । मोहम्मद नदिमले ५० रन थप्दा आयान खानले ४१ रन जोडे ।

यूएईका जुनैद सिद्दिकी र रोहन मुस्तफाले समान दुई विकेट लिए । आयान अफजल खानले एक विकेट लिए ।

त्यसअघि टस हारेर ब्याटिङमा आएको यूएईले निर्धारित ५० ओभरमा आठ विकेट गुमाएर २२७ रनको योगफल खडा गरेको थियो ।

यूएईका आयान अफजल खानले ५८ रन बनाएका थिए । भ्रित्या अरविन्दले ४९, रमिज साहजादले ३८ र आसिफ खानले २७ रन जोडे ।

ओमानका जय ओडेड्राले तीन विकेट लिए । बिलाल खान र फयज बटले समान दुई विकेट लिए । आयान खानले एक विकेट लिए ।

ओमानले यसअघि पहिलो खेलमा आयरल्यान्डलाई पाँच विकेट लिए । यता, यूएईको भने प्रतियोगितामा लगातार दोस्रो हार हो । यसअघि यूएईले पहिलो खेलमा श्रीलंकासँग १७५ रनले हार बेहोरेको थियो ।

जिम्बाब्वेमा जारी छनोट प्रतियोगितामा सहभागी १० टिमलाई दुई समूहमा विभाजन गरिएको छ । समूह ‘ए’ मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन् । समूह ‘बी’ मा युनाइटेड अरब इमिरेट्स (यूएई), श्रीलंका, स्कटल्यान्ड, आयरल्यान्ड र ओमान छन् ।

दुई समूहबाट समान शीर्ष तीन टिम सुपर सिक्समा प्रवेश गर्ने छन् । सुपर सिक्सबाट शीर्ष दुई टिमले यसै वर्ष भारतमा हुने एकदिवसीय विश्वकपमा स्थान बनाउने छन् ।