काठमाडौं । आईसीसी विश्वकप छनोटमा बुधबार स्कटल्यान्डले आयरल्यान्डविरुद्ध एक विकेटको रोमाञ्चक जित निकालेको छ ।

जिबाब्वेको बुलावावोस्थित क्विन्स स्पोर्ट्स क्लबमा भएको खेलमा आयरल्यान्डले प्रस्तुत गरेको २८७ रनको लक्ष्य स्कटल्यान्डले निर्धारित ५० ओभरमा नौ विकेट गुमाएर पूरा गर्‍यो ।

स्कटल्यान्डलाई जितका लागि अन्तिम ओभरमा आठ रनको आवश्यकता थियो । ४९औँ ओभरको समाप्तिमा स्कटल्यान्डले आठ विकेट गुमाएर २७९ रन बनाएको थियो ।

पहिलो बलमा चौका प्रहार गर्दै मिचेल लियस्कले स्कटल्यान्डलाई सहज जिततर्फ उन्मुख गराएका थिए । दोस्रो बलमा एक रन लिए पनि तेस्रो बलमा भने स्कटल्यान्डले सफयान सरिफलाई गुमाएपछि दबाबमा आएको थियो ।

स्कटल्यान्डलाई जितका लगि अन्तिम तीन बलमा चार रन आवश्यक हुँदा एक विकेटमात्र बाँकी थियो । अन्तिम ओभरको चौथो बल डट हुँदा पाँचौ बलमा एक रन आयो । त्यसपछि स्ट्राइकमा आएका लियस्कले पुनः चौका प्रहार गरेपछि स्कटल्यान्डले रोमाञ्चक जित निकालेको थियो ।

स्कटल्यान्डको जितमा लियस्कले अविजित ९१ रन बनाए । उनले ६१ बलमा नौ चौका र एक छक्का प्रहार गरे । ओपनर क्रिस्टोफर म्याकब्रिडले ५६ रन जोडे । मार्क वाटले ४७, क्रिस ग्रेभेसले २०, टोमस म्याककिन्टोसले १८, जर्ज मुन्सेले १५ रन जोड्दा कप्तान रिची बेरिङ्टनले र ब्रान्डन म्याकमुलमले समान १० रन थपे ।

आयरल्याडका मार्क अडायरले तीन विकेट लिए । जर्ज डकरेल र जस लिटिलले समान दुई विकेट लिँदा कर्टिस क्याम्फेर र बेन ह्वाइटले दुई–दुई विकेट लिए ।

त्यसअघि टस हारेर ब्याटिङमा आएको आयरल्यान्डले निर्धारित ५० ओभरमा आठ विकेट गुमाएर २८६ रनको योगफल खडा गरेको थियो ।

आयरल्यान्डका कर्टिस क्याम्फेरले १२० रन बनाएका थिए । जर्ज डकरेलले ६९, एन्डी म्याकब्रिनले ३२ र ग्यारेथ डेलानीले १९ रन जोडे ।

स्कटल्यान्डका ब्रान्डन म्याकमुलमले पाँच विकेट लिएका थिए । सात ओभर बलिङ गरेका म्याकमुलमले एक मेडन राख्दै ३४ रन खर्चिए ।

क्रिस सोल, मार्क वाट र क्रिस्टोफर म्याकब्रिडले समान एक विकेट लिए ।

यो जितसँगै दुई अंक जोडेको स्कटल्यान्ड समूह ‘बी’ को तेस्रो स्थानमा छ । दुई खेल खेल्दा पनि अंकविहीन आयरल्यान्ड चौथो स्थानमा छ ।