काठमाडौं । आईसीसी विश्वकप छनोटको आफ्नो पहिलो खेलमा ओमानले टेस्ट मान्यता प्राप्त आयरल्यान्डविद्ध पाँच विकेटको जित निकालेको छ ।

सोमबार जिम्बाब्वेको बुलावायो एथलेटिक क्लबमा आयरल्यान्डले प्रस्तुत गरेको २८२ रनको लक्ष्य ओमानले ४८.१ ओभरमा पाँच विकेट गुमाएर पूरा गर्‍यो ।

ओमानका जितमा कश्यप प्रजापतिले ७२ रन बनाए । उनले ७४ बलमा ६ चौका र एक छक्का प्रहार गरे । कप्तान जिसान मक्सुदले ५९ रन बनाए । अकिब इल्यासले ५२, मोहम्मद नदिमले ४६, आयन खानले २१ र सोएब खानले १९ रन बनाए ।

आयरल्यान्डका जस लिटिल र मार्क अडाएरले समान दुई विकेट लिए । जर्ज डकक्रोलले एक विकेट लिए ।

त्यअसघि टस हारेर ब्याटिङका लागि निम्त्याइएको आयरल्यान्डले निर्धारित ५० ओभरमा सात विकेट गुमाएर २८१ रन बनाएको थियो ।

आयरल्यान्डका लागि डकक्रेलले अविजित ९१ रन जोडे । डकक्रेलले ९८ बलमा सात चौका र दुई छक्का प्रहार गरे । टेक्टरले ८२ बलमा पाँच चौकासहित ५२ रन बनााए । लोर्कान टकरले २६ र पाउल स्टर्लिङले २३ रनको योगदान गरे । एन्डी म्याकब्रेन र गारेथ डेलेनीले समान २० रन जोडे ।

ओमानका विलान खान र फयाज बटले समान दुई विकेट लिए । जिशम मक्सुद, आयान खान र जय ओडेड्राका नाममा एक÷एक विकेट रह्यो ।

छनोट प्रतियोगितामा आयरल्यान्ड र ओमान समूह ‘बी’मा छन् । यो समूहमा श्रीलंका, युनाइटेड अरब इमिरेट्स (यूएई) र स्कटल्यान्ड समेत छन् ।

प्रतियोगिताको पहिलो दिन समूह ‘ए’अन्तर्गत जिम्बाब्वेले नेपाललाई आठ विकेटले हराएको थियो । दुईपटकको विश्व विजेता वेस्ट इन्डिजले अमेरिकालाई ३९ रनले पराजित गरेको थियो ।

दुवै समूहका शीर्ष तीन टिमले प्रतियोगिताको सुपर–६ मा स्थान पक्का गर्नेछन् । सुपर–६ बाट शीर्ष दुई टिमले भारतमा हुने विश्वकपमा स्थान पक्का गर्नेछन् ।