काठमाडौं । वनिन्दु हसरंगाको घातक बलिङप्रेरित श्रीलंकाले आईसीसी विश्वकप छनोटको आफ्नो पहिलो खेलमा युनाइटेड अरब इमिरेट्स (यूएई) माथि १७५ रनको फराकिलो जित निकालेको छ ।

सोमबार जिम्बाब्वेको बुलावायोस्थित क्विन्स स्पोट्स क्लबमा श्रीलंकाले प्रस्तुत गरेको ३५६ रनको लक्ष्य पछ्याउने क्रममा यूएई १८० रनमै समेटियो । यूएईका मुहम्मद वसिम र भ्रित्या अरविन्दले समान ३९ रन बनाए । अली नासेरले ३४, रमिज साहजादले २६ र रोहन मुस्तफाले १२ रन जोडे ।

यूएईलाई सस्तैमा समेट्न श्रीलंकाका हसरंगाले ६ विकेट लिए । आठ ओभर बलिङ गरेका हसरंगाले एक मेडन राख्दै २४ रनमात्र खर्चिए । धनन्जय डी सिल्भा, लहिरु कुमारा र महिस थिक्षणाले समान एक विकेट लिए ।

त्यसअघि टस हारेर ब्याटिङका लागि निम्त्याएको श्रीलंकाले निर्धारित ५० ओभरमा ६ विकेट गुमाएर ३५५ रनको बनाएको थियो । ।

१९९६ मा विश्वकपको उपाधि जित्न सफल श्रीलंकाका लागि कुशल मेन्डिसले सबैभन्दा धेरै ७८ रन बनाए । सधीरा समरविक्रमाले ७३ रन बनाउँदा ओपनर पाथुम निसान्काले ५७ र दिमुथ करुणारत्नेले ५२ रन बनाए । चरिथ असलंकाले अविजित ४८ रन बनाए भने वानिन्दु हसरंगा २३ रनमा अविजित रहे ।

यूएईका अली नासरले दुई विकेट लिए । बासिल हमीद, आयान अफजल खान र रोहन मुस्तफाले एक–एक विकेट लिए ।

छनोट प्रतियोगितामा श्रीलंका र यूएई समूह ‘बी’मा छ । यस समूहमा श्रीलंका र यूएईबाहेक आयरल्यान्ड, ओमान र स्कटल्यान्ड छन् । आजै जारी अर्को खेलमा आयरल्यान्डले ओमानलाई जितका लागि २८२ रनको लक्ष्य पेस गरेको छ ।

प्रतियोगितामा पहिलो दिन समूह ‘ए’मा आयोजक जिम्बाब्वेले नेपाललाई आठ विकेटले हराएको थियो भने दुई पटकको विश्व विजेता वेष्ट इन्डिजले अमेरिकालाई ३९ रनले हराएको थियो ।

दुवै समूहका शीर्ष तीन टिमले प्रतियोगिताको सुपर–६ मा स्थान पक्का गर्नेछन् । सुपर–६ बाट शीर्ष दुई टिमले भारतमा हुने विश्वकपमा स्थान पक्का गर्नेछ ।