काठमाडौं । नेकपा एकता राष्ट्रिय अभियानका संयोजक वामदेव गौतम नेकपा (एमाले) जान तयार भएका छन् ।
आज दिउँसो च्यासलमा एमाले अध्यक्ष केपी शर्मा ओलीसँगको भेटवार्तामा उनले दोस्रो वरीयता दिए आफू पार्टीमा फर्कन तयार भएको बताएका हुन् ।
“म पार्टी एकताका लागि तयार छु । मलाई तपाईंपछिको दोस्रो वरीयताको कार्यकारी भूमिका चाहिन्छ,” उनले भेटमा राखेको आफ्नो मागबारे बाह्रखरीसँग भने, “अरु साथीहरुको सम्मानजनक व्यवस्था हुनुपर्छ ।”
एमालेमा अहिले ओलीपछि वरिष्ठ उपाध्यक्ष ईश्वर पोखरेल दोस्रो वरीयतामा छन् ।
पार्टीमा रहेका व्यक्तिहरुको भूमिकाबारे आफूले लिस्ट तयार गरेर ओलीलाई बुझाउने उनले बताए । जवाफमा ओलीले पार्टीमा छलफल गरेर निर्णय दिने बताएका छन् ।
“उहाँले सकारात्मक छु । सबै साथीसँग सल्लाह गर्छु भन्नुभएको छ,” गौतमले भने । भेटमा सौहार्दतापूर्ण कुराकानी भएको उनले बताए ।
“राम्रा कुरा भए । हार्दिकतापूर्वक कुराकानी भयो । दुइटा साथीहरुबीच जसरी कुराकानी हुन्छ, त्यस्तै कुरा भयो,” उनले भने ।
गौतमले ओलीलाई आफूले तयार गरेको दस्तावेज दिएको र त्यसलाई पार्टीमा छलफल गर्ने आश्वासन पाएको समेत बताए ।
“मैले विकास गरेका केही विषयबस्तु छन् । कृषि उत्पादनको आमूूल परिवर्तन गर्ने, शासन प्रणालीलाई आमूल परिवर्तन गर्ने । तेस्रो, निर्वाचन प्रणालीमा आमूल परिवर्तन गर्ने । यस्ता ती विषयहरुको दस्तावेज ओलीजीलाई बुझाएको छु,” उनले भने, “अहिले तपाईंको विचार हो । पार्टीले ग्रहण गर्ने सिर्जना भयो भने पार्टीको विचार हुन्छ भन्नुभयो ।”
