काठमाडौं । प्रस्तावित प्रधानन्यायाधीश हरिकृष्ण कार्कीले कहिलेकाहीँ कानुन र न्याय मिलाउन धर्मसंकट पर्ने बताएका छन् । शुक्रबार सिंहदरबारमा बसेको संसदीय सुनुवाइ समितिको बैठकमा सांसदले सोधेका प्रश्नको जवाफ दिने क्रममा उनले यस्तो बताएका हुन् ।
न्यायाधीशले प्रमाण हेर्ने भन्दै मुद्दा कमजोर भएर आए आफूहरूले केही गर्न नसक्ने उनले बताए । ‘धर्मसंकट’का बेला मिलापत्र गराउनेतर्फ जोड दिइने उनले उल्लेख गरे ।
“हेर्ने प्रमाण हो हामीले । मुद्दा कमजोर भएर आए हामीले के गर्ने र ? जे कागज बनेर आउँछ, त्यसैलाई मान्ने हो । सम्पत्तिसम्बन्धी देवानी मुद्दामा लिखित प्रमाण हेर्नेबाहेक उपाय छैन,” उनले भने, “कहिलेकाहीँ कानुन र न्याय मिलाउन धर्मसंकट पर्छ । त्यस्तो बेला मिलापत्र गरेर दुवै जित्नुस् भन्छौँ । यसले इजालबाट भन्दा सकारात्मक प्रभाव पर्छ । मानिस हो, गल्ती हुँदैन भन्दिनँ म ।”