जनकपुरधाम । मधेस प्रदेशका मुख्यमन्त्री सरोज कुमार यादव आज विश्वासको मत लिने भएका छन् । आज अपराह्न ५ बजेका लागि बोलाइएको प्रदेश सभामा बैठकमा यादवले विश्वासको मत लिन लागेका हुन् ।

नेकपा (एमाले)ले जेठ १ गते सरकारबाट बाहिरिँदै समर्थन फिर्ता लिएको थियो । संवैधानिक व्यवस्था अनुसार सरकारमा सहभागी दलले समर्थन फिर्ता लिएमा ३० दिनभित्र मुख्यमन्त्रीले प्रदेश सभामा विश्वासको मत लिनुपर्छ ।

हाल प्रदेश सरकारलाई एमालेबाहेक सबै दलको समर्थन छ । कुल १०७ सांसद रहेको प्रदेश सभामा बहुमतका लागि ५४ जना सांसदको साथ चाहिन्छ ।

सरकारको नेतृत्व गरिरहेको जनता समाजवादी पार्टी (जसपा) र नेकपा (माओवादी केन्द्र)को सम्बन्ध अहिले बिग्रिएको छ । माओवादी केन्द्रले नियमित दुईवटा प्रदेश सभा बैठक नै बहिष्कार गरिसकेको छ । डा. सीके राउत नेतृत्वको जनमत र महन्थ ठाकुर नेतृत्वको लोसपा पनि सरकारसँग असन्तुष्ट छन् । यी तीनै दलले सम्मानजनक मन्त्रालय नपाएको गुनासो गर्दै आएका छन् ।

यस्तो अवस्थामा मुख्यमन्त्रीलाई विश्वासको मत पाउन केही कठिनाइ हुने देखिन्छ ।

अहिले सरकारलाई जसपाका १८, नेपाली कांग्रेसका २२, जनमत पार्टीका १३, लोसपाका ९ र माओवादी केन्द्रका ९ सांसदको सर्मथन छन् । यीबाहेक नागरिक उन्मुक्ति, नेपाल संघीय समाजवादी, राप्रापा र तीन स्वतन्त्र सांसदले पनि सरकारलाई सर्मथन गरेका छन् ।