काठमाडौं । नेकपा (एमाले)का महासचिव शंकर पोखरेलले नेकपा (एकीकृत समाजवादी)बाट आएका नेता मुकुन्द न्यौपानेलाई केन्द्रीय सदस्य बनेपछि उठ्ने प्रश्नको सम्बोधन गर्न ७० वर्षे उमेरहद स्थगन गरिएको बताएका छन् । सोमबार पार्टी कार्यालयमा आयोजित कार्यक्रममा उनले त्यस्तो बताएका हुन् ।

“हामीले नेकपा (एकीकृत समाजवादी)का तेस्रो तहका नेता मुकुन्द न्यौपानेलाई पार्टी एकीकरणको प्रत्यत्नमा जोड्ने प्रक्रियाअन्तर्गत उहाँलाई केन्द्रीय सदस्यमा मनोनयन गरेपछि उठ्ने प्रश्नको सम्बोधनका रुपमा हामीले स्थगन गरेका छौँ,” पोखरेलले भने ।

उनले पार्टी लोकतान्त्रिक अभ्यासबाट आएको बताए । पोखरेलले नेकपा (माओवादी केन्द्र)मा पुष्पकमल दाहाल प्रचण्ड ०४५ सालदेखि लगतार प्रमुख रहेको बताउँदै आफ्नो पार्टीमा भने त्यसयता मदन भण्डारी, माधव नेपाल, झलनाथ खनाल, केपी ओली नेता बनेको बताए ।

उनले ७० वर्षे उमेरहदले नेतृत्वमा बदलाव आउने र लोकतान्त्रिक पद्धतिबाट नआउने भन्ने कुरा नभएको उनको भनाइ छ ।

“एकातिर एकजना नेता, अर्कोतिर पाँचजना नेता भएको पार्टी हो । यो विषय उठाएर नेतृत्वको जीवन्ततामा समस्या हुन्छ कि भन्नु पर्दैन,” पोखरेलले भने, “७० वर्षे उमेरहदले नेतृत्वमा बदलाव आउने, लोकतान्त्रिक विधिबाट नेतृत्वमा बदलाव आउँदैन भन्ने कुरा केही होइन । हाम्रो पार्टीले आफ्नो अभ्यासद्वारा स्थापित गर्दै आएको कुरा राख्न चाहन्छु ।”

एमालेको पार्टी विधानमा रहेको ७० वर्षे उमेरहद सचिवालय बैठकले निलम्बन गरेपछि चर्चा भइरहेको छ ।