काठमाडौं । सत्तारुढ नेपाली कांग्रेसका सांसद रामहरि खतिवडाले प्रमुख प्रतिपक्ष दल नेकपा (एमाले)ले संसद्लाई अनिर्णयको बन्दी बनाउन खोजेको आरोप लगाएका छन् ।

आइतबार संघीय संसद् भवन परिसरमा सञ्चारकर्मीमाझ उनले एमालेले संसद्मा उठेको जलहरी प्रकरणको विषयमा छलफल नै गर्न नदिएर अपरिपक्वता प्रर्दशन गर्न खोजेको आरोप लगाउँदै त्यसको विरोध गर्ने बताए । 

सांसद खतिवडाले महालेखापरीक्षकको प्रतिवेदनले औँल्याएको जलहरी प्रकरणबारे आफूहरुले संसद्मा फेरि पनि कुरा उठाउने बताए । 

“प्रतिपक्ष यस्तो अनम्याच्युअर छ । एकछिन जुरुक्क उठेर संसद्तिर घेर्न पुग्छ । किनभन्दा जलहरीको सुन हरायो रे । ए बाबा, महालेखाको प्रतिवेदनमा हरायो भनेकै छ । महालेखाको प्रतिवेदन सबै सांसदको हातहातमा दिएको छ । त्यो बारेमा छलफल गर्नै छ,” उनले भने, “ हामीलाई चिन्ता के हो भने १० किलो पशुपतिनाथ संसारकै देउताको मन्दिरमा राख्न लागेको सुन त बदमासी गर्नेले अरु देशलाई के गर्लान् ?”

सांसद खतिवडाले संसद्मा उठेका सबै विषयमा छलफल गर्न संसद् स्वतन्त्र हुुनुपर्ने बताए ।